NEIGRIHMS nung aliba doctor temi longkak ait

Shillong, March 23 (Agencies): Tawa Maharashtra nung doctor ka dak mozüki nung shiranga aliba kinungertemi taochi mekai kanga mejungi azükba asoshi tejashi sayua NEIGRIHMS Residents Doctor Association (NRDA) ajanga March 22 nung parnok mapa inyakba mapang tekabu nung lisü tanak mesüloker inyak.
“Iba ajanga tai maketba doctor ka duty nung aliba mapang taochi melii azükba aser India tesem balala nung ‘medical professional’ tem mezüngmeshiba asoshi khukhua aitsüba sayur,” ta NRDA nung tir, Dr Ete Tony-i ashi.
“Taoba hopta ana tsüngda doctor tem dak iba ama mapa tamajung inyakba lendong timba akümba ajanga onok kümzüka mali ta sayur. Mozüki nung lia inyaker doctor temi hopta ka nung ghonda 100 dak tali mapa inyaker, saka parnok merenshia aser tim mesüi amshiba ngua temolung shiranger,” ta Dr Tony-isa ashi.
Iba ama lendong atalokaka linük nung temzüng aser ozüng amshir ketdangsürtem aser linük nung yimsüsürtemi doctor tem taküm kümzüka alitsü asoshi sentong balaka meinyaker.
Tawa Bombay High Court ajanga doctor tem ya factory nung inyakertem den medemdangba asoshia NRDA ajanga mepelaba shisem.
“Mapa inyakba tesemtem nung kümzüka alitsü ya nübur ajunga indang temeten ka lir aser iba maongka ya sorkar mapa nung ketdangsür teshimtet aser minister tem kisüng atema masü. Tetsübu agi sünger doctor temi mapa inyaktsü ya kanga tasak lir,” ta NRDA tir-isa ashi.
“Onok taküm kümzüka alitsü asoshi sorkari sentong balala ajanga teyari agütsütsü melena mapa nungi anentsütsü ang amokmerener,” ta paisa shisem.
“Iba ama tensa tamajung onoki anogoshia ajuruaka nüburtem molung chidaktsütsüsa NEIGRIHMS nung aliba doctor temi bendanga agüja inyaker,” ta Dr Tony-i maneni ashi.
Aibelenertem tekeraba nung bushiteta tapet temerenshi agütsütsü aser tarutsü nung mozüki nung mapa inyakyim aser shiranger anepaluba nung timtem magütsütsü asoshi sorkari mapatong balala inyaktsü asoshi NEIGRIHMS nung inyaker doctor temi sorkar nem takhangba agütsü.