Neiphiu Rio-i asür Lhusileü Haralu mang ayimer

Dimapur, November 18 (TYO) : Mrs. Lhusileü Haralu ajungbena asüba osang angashia temulung raksar aser kanga sasa bilemer, ta Nagaland nungi Lok Sabha MP, Nepihiu Rio-i sangdong ka nung metetdaktsü.

La Nagaland nung Peace Mission nung züngsem ka asüdang ni la den külemi inyaksem aser iba mapang lai Naga nunger ajungtsü atema bilemba aser yimjung bener arutsü atema inyakba ni kanga kjunga metet. Tanü Naga nunger otsü nung yimjung aginüba mapang ka nung asür Lhusileü Haralu-i iba lima toktsür aobaji tesasatsüka lir, ta Neiphiu Rio-isa sangdong nung shia lir.

Lai iba akümli toktsür aoba sülen lai inyakba mapa melenzüktsüji kanga tasak asütsü aser iba asüku mapang ni aser ozü kibongi tasür kibong den mangyim tejashi lemsateper. Lai inyakba mapatem kodanga mamatsü aser lai Nagaland nung yimjung bener arutsü mangdang ayuba künübo asangsang nung ataloktsü, ta Rio-isa sangdong nung metetdaktsü.