Neiphiu Rio-i kidanger state tem den tesentaktep tajung ayutsü nangzük

Guwahati, Monupii (May) 20 (TYO): Northeast nung state shia putiotsü aser sobaliba balala lir saka iba tesem ya ka dang aser state o state tsüngda tesentaktep tajung melira asenoki timtem ajurutsü ta tanü Nagaland Chief Minister Neiphiu Rio-ia o jembidang ashi.
Tanü Srimanta Sankaradeva International Auditorium, Guwahati nung NEDA 3 buba Conclave nung jembidang Rio-i “Asenok kati ka nüngdaker aser asenok külemi yaritepa aotsüla ta nibo bilemer” ta ashi.
Tesüiba küm 21 tashi Naga yimten tebilemtsü atema ceasefire aser yimjung olemtep liyonga arudar aser kobi melii iba khuret koktettsü ta imlar. Prime Minister Narendra Modi aser BJP-i aniba NDA sorkari Naga yimjung maparen nung temulung agütsüba atema kanga pelar, ta paisa ashi.
“Iba onük asoshi onoki northeast state tem teyari nüngdaker aser Naga yimten latetba nung state mesüra nisuing shinga anema masütsü ta ni nangzüker. Naga yimten latetba ajanga asenok longjemtsü aser ka akümtsü ta ni imlar. Nenoki tsübua bilemba amaji mataloktsü aser asenok kati ka yaritepa liyonga aotsüsa mulungteptsü” ta Rio-isa metetdaktsü.
State tem den arrtsü mangatettep ken o tem aliba atema Rio-isa ashiba agi, Assam den mapang talangka arrtsü dak sendakba nung ken o adoka lir aser ibaji Supreme Court nung benoka lir.
“Assam Chief Minister Sarbananda Sonowal-i arrtsü ken o angatetteptsü atema olemtep alitsü ta ashiba olen Dr Himanta Biswa Sarma-i kü dang ashi aser ni ibaji angashidang kanga pela. Nia iba tebilemba pusema nungiter aser kidanger state tem tsüngda ken o tem angatetteptsüla ta bilemer, kechiyong onük tilatem ajanga asenok mapang talang ka telemsa adoka lir” ta paisa metetdaktsü.
“Assam Chief Minister Sarbananda Sonowal-i arrtsü ken o angatetteptsü atema olemtep alitsü ta ashiba olen Dr Himanta Biswa Sarma-i kü dang ashi aser ni ibaji angashidang kanga pela. Nia iba tebilemba pusema nungiter aser kidanger state tem tsüngda ken o tem angatetteptsüla ta bilemer, kechiyong onük tilatem ajanga asenok mapang talang ka telemsa adoka lir” ta paisa metetdaktsü.
BJP President Amit Shah-i North East Democratic Alliance (NEDA) tentetba atema Rio tenüngsang agütsü aser northeast atema iba sabang ya kanga tongtipang lir ta shisem.
BJP national president Amit Shah, Prime Minister Narendra Modi, BJP lennirtem, Nagaland State unit BJP aser teyariteper teloktemi NDPP nungitba atema Rio-isa prnok ajak dang pelaba metetdaktsü aser iba ajanga parnok NEDA nung züngsem tasentiba kümogo ta shisem.
Chief Minister Rio aser Deputy Chief Minister Y. Patton nati anir Minister aser Advisor aika NEDA senden nung aden.