Neiphiu Rio-i Kohima DPDB züngsemtem ayongzük

Rongchii (April) 16, 2018 nü Chief Minister Neiphiu Rio-i Kohima DPDB senden den Kohima District nungi MLA tem pelaa agizükba sentong nung o jembidang agiba noksa angur. Noksa nungsa NLA Speaker Er. Vikho-o Yhoshu, Advisor Neikiesalie Kire, Advisor R. Khing, Advisor Er. Zale Neikha, MLA Keneizhakho Nakhro aser Kohima DC, Rajesh Soundararajan IAS nungertem angur.

Dimapur, Rongchi (April) 16 (TYO): Rongchii (April) 16, 2018 nü Kohima District Planning & Development Board senden den Kohima District nungi MLA tem pelashishia agizükba sentong ka agi.
Iba sentong ya DPDB indang Conference Hall, Kohima nung agi aser mendenji Youth Resources & Sports Advisor aser Kohima DPDB Chairman, Er. Zale Neikha liasü.
Sentong nung Nagaland Chief Minister Neiphiu Rio, Speaker NLA Er. Vikho-o Yhoshu, Rural Development Advisor Neikiesalie Kire, Vety & AH & Women Resources Advisor R. Khing aser MLA Keneizhakho Nakhro nungertem aden.
Sentong nung o jembidang Chief Minister, Neiphiu Rio-i 1980s mapang pa mezüng District Planning & Development Board züngsem ka akümba menungra jembi.
Iba mapangji pa area council chairman ka ama züngsem aküm aser kümtem süia arudang DPDB kanga terenlok ngua arudar, ta Rio-i ashi.
State yimtiba nung mapa lemzükba ketdangsertem jenjang tajungba lir aser iba amaji tebilemtsüa tuluba lir. Nagaland nung tanü tensa tajungba kümogo ajisüaka asenoki chichiba yimjungbo ano mangu lir. Anungji, public tenzükertem ama asenoki nübortem indang rongsenkettsüng ajungkettsü atema mapa inyaktsüla, ta paisa ashi.
Asen taküm atema rongsenkettsüng kanga tongtipang aser asenok pei sasa liteta mao tashi tangar kübok alitsü. Naga nungeri rongsenkettsüng atema süoiki ia mebilemer aser mapa inyaktsü yimya sübaa mali. Anungji district nung Head of Department ajaki yimdaklirtem rongsenkettsüng jenjang tajungba kümdaktsütsü atema nendaka inyaktsü ayongzüker, ta Chief Minister-isa metetdaktsü.
Küm ka mesüra mapa telatet ka atema yimtsüng kati scheme inyakbaji Deputy Commissioner-i reprangshimtsüla aser local area developing fund mesüra department balala mesüra yimtsüngtem indang küm shia osang bendentsüla, ta Rio-isa shisem.
Paisa Kohima district nung tensa meraksatsü aser merükmejua ayutsü atema ashidang, tzüngluruwa marudang sorkar mapa inyakertem aser shishilembartemi nübodoka mapa inyaktsü sentongji agitsü atema ayongzük.
Chief Minister Rio-isa DPDB Chairman Er. Zale moatsü aser DPDB züngsem ajaki pa den yariteptsü imlar ta ashi.
Chairman DPDB, Er. Zale Neikha-ia o jembidang, züngsem ajak dang pa den yariteptsü ayongzük.
“Kohima ya asen state yimtiba lir anungji tanga district tem dang nungi asenoki tali bendanga agütsütsüla aser tebilemtsü bena inyaktsüla” ta paisa ashi.
Sentong nung Deputy Commissioner & DPDB Vice Chairman Rajesh Soundararajan IAS-i tesentepertem pela agizük aser Speaker NLA Er. Vikho-o Yhoshu, Advisor Neikiesalie Kire, Advisor R. Khing aser MLA Keneizhakho Nakhro nungertemia o tatsütsü jembi.