Neiphiu Rio-i lanurtem dang sobaliba wazüka ayutsü ayongzük

December 13, 2017 nü Viswema nung SAYO silver jubilee benjung nung Lok Sabha MP Neiphiu Rio nem sempet agütsüdang agiba noksa angur. 

Kohima, December 14 (TYO): Bodbarnü Southern Angami Youth Organisation (SAYO) pur küm 25 ajungba benjung amung aser iba sentong nung Lok Sabha MP Neiphiu Rio-i tongti tesemdanger ama shilem agi.
Iba sentong ya “Rekindling traditions” omen nung ajemdaker John Government Higher Secondary School Ground, Viswema nung agi.
Asen tetsü-tebou mapang yimyatsüya tajung aser wainshintem tanü asen putu nung sama odar anungji item senmang tajung asenoki tanaben shia arudaktsütsüla, ta tanü Neiphiu Rio-i o jembidang ashi.
“Southern Angami lanurtemi lanur telok ajungketba den tanga mapa aika nung mapa tajung inyaka arur. Lanurtem dak onoki teimla ayur anungji nenok tsürabutem aser taintem nenok asoshi meranga inyakba amajok tekümdaktsü. Nenoki tebilemtsü abentsüla aser loktiliba nung khuret abenba nisung ka akümtsü merangang. Nür tsürabur aser kinungertemi nü dak nungi tepela angutsübaji, nai parnok nem tajung meyipa agütsübaji dang asütsü” ta paisa ayongzük.
Sobaliba asentenshitsü aser tajungba kümdaktsütsü indang olen jembidang, Rio-i “Yimtsüng aser tesem shia sobaliba inyakyim balala lir aser kar tajung aser kar tamajung lir aser item inyakyim ajanga lanurtem aniteter” ta ashi.
Japan nungeribo pei chirnur tila asüdang nungi yimyatsüya aser wainshintem sayur aser ibaji ajanga lanur tajung adoker. Naga nungeri iba ama inyakyimtem ajizüka inyaktsü atema mapang agitsü saka asenokia yamaji inyaktsüla, ta paisa shisem.
Alima ainba ajanga asen sobaliba senzüka meyutsütsüla. Sobaliba sülen anidaktsü ta asüba tetezü asen tetsü-tebou nunger tamangba yimsü sülen anidaktsüba masü saka sobaliba nungi inyaksangshi aser yimya tajungtem angazüka benshitsü atema lir. Asenoki sobalibaji tanü tensa den apet metongshia amshitsüla, ta Neiphiu Rio-isa metetdaktsü.
Tanü benjungmung nung Rio-i National Highway-2 anasa SAYO silver jubilee nüngshilung sayatsü aser CRC Jakhama Pastor, John Zao-i meshiteta sarasademtsü.
Southern Angami-I Assembly Constituency nungi MLA, Mechanical Engineering & NSMDC Parliamentary Secretary, Vikho-o Yhoshü-i o tatsüka jembidang, lanurtemi oboula nunger sobaliba nung ammettsü ayongzük.
Nagaland state nung tanü yimten tsütsü mepetmesü aliba ajanga parnoki iba tesem nung terenlok mapa meinyaktet, ajisüaka taruba sorkar mapang ajaklen terenlok bener arutsü ta Vikho-o-isa ashi.
Southern Angami-II Assembly Constituency nungi MLA aser Economics & Statistics & SCERT Parliamentary Secretary, Kropol Vitsu-ia sentong nung o jembi.
Sentong nung mendenji Jubilee organizing committee convenor Vitsorel Lcho liasü, Viswema Baptist Church Pastor Rev Atha Neikha-i temoatsü meshia sarasadem aser Neisizo Kuotsu-i tir o jembi.
Sobaliba sentong ka agiba nung Southern Angami region kübok yimtsüng 13 nungi yartsüngsangertemi shilem agi.