Neiphiu Rio-i Myanmar arrtsü anasa alirtem atema khuret lemsatep

Dimapur, Monupii (May) 5 (TYO): Monupii (May) 4, 2018 nü External Affairs Minister Sushma Swaraj menden ser amenba senden nung Nagaland Chief Minister Neiphiu Rio-i o jembidang Myanmar den arrtsü anasa yimdaklirtem nem timtem magütsütsüla ta ashi.
Myanmar tsütsü NSCN (K) aliba ajanga security maparen inyaktsüsa akümer saka iba asoshi arrtsü anasa aliba yimdaklirtem nem timtem magütsütsüla, ta Rio-i ashi.
Nagaland-i Myanmar den kilometer 215 shi kati arrtsüa lir aser anatsülen alirtem tsüngda sobaliba aser oshi kasasa lir. Anungji Free Movement Regime ajanga linük ana tsüngda senzüsenbong melatsü saka iba tesem nung gari lenmang tajungba kümdaktsütsüla ta Rio-isa ashi.
India-i India-Myanmar-Thailand Trilateral Highway aser Kaladan Multimodal Project takok ngua inyakdar. Maneni ASEAN linüktem den maritime & air connectivity maparen tekaratiba nung inyaktsüla aser Cambodia, Lao PDR o Viet Nam tashi India-Myanmar-Thailand Trilateral Highway ka yanglutsü bilemdar, ta paisa shisem.
India-Myanmar-Thailand Motor Vehicle Agreement (IMT MVA) ajanga senzüsenbongertem aser oset abenba garitem zübazüba senzütettsü, ta Nagaland chief minister-isa metetdaktsü.
India aser Myanmar na sendaktepba tongtipang lenmangji NH 29 lir aser iba ajanga Dimapur den Kohima aser Imphal nungi Moreh tashi sendakteper. Dimapur nungi Kohima tashi 4 laning mapa teinyakdak lir aser Imphal-Moreh tashi yanglutsü agizükogo anungji Kohima nungi Imphal tashi 4 laning atema benoktsüla, ta paisa ashi.
Yashi External Affairs Minister Sushma Swaraj-i ‘Act East Policy’ atema North East nungi Chief Minister tem den senden amendang onük aika benoka olemtep.
Olemtep alidang Dr Rajiv Kumar, Vice Chairman, Niti Aayog, Gen (Dr) VK Singh (Retd), Minister of State for External Affairs, Foreign Secretary, Secretary (East) from the Ministry of External Affairs, Ministry of DoNER aser North Eastern Council Secretary tem den Civil Aviation, Ministry of Home, Road Transport & Highways ketdangsertemia shilem agi.