Neiphiu Rio-i Naga nunger longjema alitsü ayongzük

Dimapur, February 19 (TYO) : Lok Sabha MP, Neiphiu Rio-i Naga nunger nunger ajak külemi ka küma longjemtsü aser ano Naga nunger den kidangsüa aliba lokti ajak den tesentaktep tajung aser angatettepa alitsü ayongzük.
February 16, 2016 nü Arunachal Pradesh kübok Kanubari nung Wancho Naga pur Oriah benjung amungdang Rio-i iba onük jembi.
Paisa, lokti ajaki Framework Agreement agiba sülen Naga yimten tebilemtsü atema inyakba mapa nung nungita yariteptsü ayongzük.
Nübortemi teti atema yimjung aser yimten telemtetba tajung ka aginür. Küm aika atsütepa aruba Indo-Naga yimten tebilemtsü atema India sorkari kanga nendaka mapa inyaker, ta Nagaland nungi Lok Sabha MP-isa metetdaktsü.
Rio-isa Oriah benjung amunger ajak dang telongjem nung benjung amungtsü aser tanga kintem dena tesentaktep tajung ayutsü tayongzükba agütsü.
Iba sentong nung Naga Hoho General Secretary, Metsekhoyi Yobo, ENSF President Sasha, ENFO , NPF aser BJP nungi lennirtemia o jembi.