Neiphiu Rio-i Nagaland nung gari lenmangtem atema teyari meshi

Shillong, Rongjui (September) 25 (TYO): Hombarnü Chief Minister Neiphiu Rio-i Union Minister for Road Transport and Highways, Shipping, Water Resources, River Development and Ganga Rejuvenation Nitin Gadkari aser MoRTH ketdangsertem den tebilemba aika lemsatep.
Shillong nung aliba State Convention Centre nung Northeast kübok National Highways aser SARDP road projects meyipa reprangshiba senden ka amendang Rio-i Nagaland nung gari lenmang tasentem yanglutsü aser tanga alibatem yanglushitsü tebilembatem benoka lemsatep.
Pai Nagaland check anasa aliba Amar Flour Mill nungi Burma camp NH 29 tashi EPC mode nung 2 lane Diversion yanglutsü tebilemba lemsatep.
NH 129 aser NH 29 lenmangtem Dimapur ajanger aser traffic timtem ajema kümdaktsütsü atema lenmang tasen ka yanglutsü nüngdaker. Iba ya Inter State Bus Terminus (ISBT) atema tajangzük asütsü aser Dimapur nung traffic khuret ajema kümdaktsütsü. Talisa iba lenmang nung toll gate ka yanglua MoRTH-i lenmang anepalutsü aser sen teindokba bendentsü akok, ta Rio-i ashi.
Paisa Nagaland nung lenmang 6 National Highways ta jaloktsütsü atema onük benoka jembidang “lenmang trokji (i) Showuba-Guzunyu-Pughoboto-Zunheboto-Aghunato-Noklak-Pangsha – 200 kms; (ii) Trans-Eastern Highway from Mon-Longwa-Pangsha-Kiphire-Avangkhu – 280 kms; (iii) NH- 29 to NH-29 (Dimapur Bye Pass) – 2.7 kms; (iv) Gandhi Ashram-Chuchuyimlang (NH-2) to Pangsha (ITC) – 167 kms; (v) Maibong-Tening in Nagaland to Tamenglong via Tamei in Manipur – 75 kms; aser (vi) Ramani Ali Simulguri – Bihubor in Assam to Mon in Nagaland – 71 kms aser lenmangtem ‘In Principle Approval’ agüja lir” ta metetdaktsü.
Rio-isa financial year 2018-19 nung 2 lane Trans-Nagaland Highway (taoba mapang Foothill Road ta ajaba) yanglutsü atema sen lemzüktsütsü ayongzük.
Nagaland nung SARDP – NE roads 4 tashi yanglutsü atema ali angati agütsür aser iba atema NHIDCL-i rongsen akoksartem nem temenok agütsütsü lemtetogo.
Iba onük atema Rio-i MoRTH dang NHIDCL-i sen ajemer agütsüba inyakyim meyipa reprangshitsü atema tetuyuba agütsütsü mepishia metetdaktsü.
National Highway No – 702 nung shilem ka ta sangdongba Changtongya – Longleng road atema jembidang, Rio-i ashiba agi, “ali kiburtemi ashishitepba atema Chief Secretary-i village council 3- Sanglu, Alayong and Yaongyimchen aser NHIDCL den külem senden ka amendang yimtsüngtemi RITES ajanga survey agiba magizükba metetdaktsü.”
Yimtsüngtemi National Highway specifications nung aliba ama ali kiburtem lia re-survey agitsü atema mepishi. NHIDCL-ia village council 3-i ashiba ama consultant tasen ka den re-survey agitsü mulungogo, ta Nagaland chief minister-isa metetdaktsü.
Union Minister Nitin Gadkari-i Nagaland nung NH aser SARDP road project tem meyipa reprangshi aser project tem tekaraba nung tembangtsü atema akokba tashi yariteptsü nangzük.
Nagaland Deputy Chief Minister aser National Highways Minister, Y. Patton-i Pfutsero – Jessami Road atema asüngdangba ka langzüdang Gadkari-i “Iba lenmang yanglushitsü aser anepalutsü atema BRO nem sen lemzüktsütsü” ta ashi nangzük.