Neiphiu Rio-i Rajnath Singh dang anentsüh nung yaritsü mepishir

Dimapur, September 1 (TYO) : Nagaland MP Nephiu Rio-i Home Minister Rajnath Singh dangi shidi ka ajanga Nagaland yimtiba Kohima nung tzünglu aruba ajanga anentsüh alua timtem tulu ajuruba indang osang metetdaktsüogo.
Nagaland aser Manipur tsüngda aliba National Highway 39 kanga mejungi raksaogo aser iba ya hopta ishika nungang yanglutettsü akok. Anentsühji Kohima nungi kilometer ishika pilar aliba Phesama nung atalok aser National Highway raksatsüba dang masü saka iba yimtsüng nung shilem tuluka raksatsüogo, ta Rio-i Home Minister dangi züluba shidi nung shia lir.
Anentsüh ajanga alu aika den kiojentem raksatsüogo aser taoba hopta ishika yimdaklirtemi ki raksaa alibatem bensayonga arudar. Iba denji külemi Kohima nunga tesem aika nung anentsüh alua lir aser Nagaland Civil Secretariat-i aoba lenmang nung mesenzütet kümogo, ta Rio-isa shia lir.
Iba dak sendakba nung National Disaster Management Authority (NDMA) puri shilem agitsü nüngdak. Parnoki relief, rehabilitation aser restoration mapa nung yariteptsüla aser kiojen samartem nem teyari agütsütsüla, kechiyong tang tashi nung NDMA-i iba lendong nung shilem agiba mangur, ta Rio-isa Rajnath dang ashi.
Ibala tensa nung yariteptsü atema State sorkar ket nung nüngdakbatem peria mali. Anungji anentsüh tsütsü mongin nisungtem arua iba lendong reprangdangtsü aser tarutsü nung item amala lendong azüoktsü aser noktangtsü atema shisadangtsü nüngdak, ta paisa shisem.
Iba lendong ajanga state balala nung senzürtem aika timtemer aser tsünüsenbongtsü aika akoksaogo. Anungji NDMA-i Nagaland nung arua yariteptsü atema nai tetuyuba agüjang ta mepishir aser India sorkari iba khuret süoki ia agizüka yariteptsü imlar, ta Nagaland MP, Rio-isa Home Minister dang shiogo.