Neiphiu Rio-i VDB aser Village Council tem ayongzük

Rongchii (April) 24, 2018 nü NBCC Convention Centre nung Chief Minister, Neiphiu Rio-i Nagaland VDB & Village Council Conference nung o jembidang agiba noksa  angur.

Dimapur, Rongchii (April) 24 (TYO): Rongchii (April) 24, 2018 nü NBCC Convention Centre nung Nagaland VDB & Village Council Conference ayonga mungogo.
Iba sentong ya Rural Development Departmen-i Gram Swaraj Abhiyan den külemi ayongzük.
Sentong nung tongti o jembirji Chief Minister, Neiphiu Rio liasü aser pai ashiba agi, “NDPP-i terenlok bener autsü sentong tasen ka tenangzükba nung election nung toktep anungji temelenshi bener arutsü atema akokba tashi merangtsü.”
PDA sorkar indang tongti teinyaktsüji tang teinyakdak yimjung olemtep nung teyariteper tajung ka asütsü atema lir aser nübortemi agizüktettsüsa tekaratiba nung telemtetba ka agitsü atema yariteptsü, ta Rio-isa ashi.
Naga nunger ajak ajangzüktsü atema nisung ajaki yariteptsü ayongzüker. Tanü Naga loktiliba nung telungpur aser tema nung alir ajak longjemtsü aser putepshitsü kanga nüngdak kümogo, ta paisa shisem.
“Asen VDB tem küm 40 shi mapa inyaka arur aser linük nung VDB tem ya Local Self Government & Community Participation atema role model ka ama züngshir” ta Chief minister-isa metetdaktsü.
Linük nung VLOs 2,30,158 aliba nungi Jakhama Block kübok Pete Village Level Organisation (VLO) nem NRLM National Award kübok Ten Best Performing VLOs sempet agütsütsü shimtetba atema kanga pelar. MGNREGS kübok senotsü aika lemzüktsüba ya timi amshira yimtsüngtem khenyongi melenshitsü akok, ta Rio-isa shisem.
Prime Minister lenisüba kübok Cabinet Committee on Economic Affairs-i Rashtriya Gram Swaraj Abhiyan (RGSA) yanglushiogo aser iba ya Rongchii (April) 1, 2018 nungi mapa küma tenzüktsü. Iba scheme atema sen crore 7255.50 lemzüktsüogo aser state ajak nung iba scheme inyaktsü. NITI AAYOG-i India nung district 115 shimtetba nung Nagaland nungia Kiphire dena lir, ta paisa metetdaktsü.
MGNREGS atema BDO temi tongti shilem agir anungji nenoki bendanga agüja mapa inyaktsüla aser schemes o projects junga inyaktsü tim. VDBs nem Grant in aid agütsüba ya yimtsüng tia nung aliba tesemtem nung tang nüngdakba civil services nung yariteptsü atema lir, ta Nagaland chief minister-isa ashi.
State sorkari 2014 nungi 2018 tashi Grant in Aid magütsütet, saka VDBs 1238, Matching Cash Grants & Micro Finance Grants, performing VDBs nem Incentives aser School Education, Power, Health & PHED communitised departments nem küm asem indang senotsü magütsüi aliba agütsütsü, ta Rio-isa metetdaktsü.
Sentong nung Rural Development Advisor, Dr. Neikiesalie Nicky Kire-i okila jembidang, VDB ya Luchii (December) 1976 nung mezüng Phek district kübok Ketsapomi yimtsüng nung tentet, ta ashi.
Ketsapomi VDB takok anguba nung ajemdaker 1980 nung state ajunga nung iba reju tenzüktsü atema mass campaign ka tenzük aser VDB Model Rules, 1980 yanglu, ta Kire-isa ashi.
Gender Budgeting nung ajemdaker Department-i Grant-in-Aid to VDB kübok Women’s scheme tenzüka aliba yimtsüng shia nung senotsü teyari agütsüba nungi 25% balaka tetsür nem lemzüktsür. Iba denji ano, MGNREGA atema tetsür mapa inyaker 40% shi yimtsüng ajak nung dendaktsür, ta Dr. Nicky-isa shisem.
2017-18 tsüngda Village Development Board aliba yimtsüng 1238 recognized süa lir aser sorkari parnok nem teyari agütsür, ta paisa shisem.
Tanü sentong nung mendenji Rural Development atema Principal Secretary, Lhoubeilatuo Kire, IFS liasü, BMC Kohima Sr. Pastor Rev. Moa Longchari-i temoatsü meshia sarasadem, Nagaland VDB Association President Thoshe Awomi-ia o jembi aser Director RD, Imlimeren Jamir-i anküp tepela o jembi.