Neiphiu Rio-i Zunheboto aser Phek semdang

Dimapur, May 15 (TYO): Nagaland Chief Minister Neiphiu Rio-i tanü Zunheboto aser Phek semdanga COVID-19 dak sendakba osangtsüsang metetpelaogo.
Hokolbarnü Neiphiu Rio den külemi Deputy Chief Minister Y. Patton nati COVID-19 Hospital Zunheboto semdang.
Iba mapang Health & Family Welfare Minister, S. Pangnyu Phom, Agriculture Minister, G. Kaito Aye, School Education Advisor, K.T. Sukhalu aser Tourism, Art and Culture, Advisor, Khehovi Yepthomi nungertem liasü.
Chief Minister-i mozü kidang isolation ward tem reprangdang aser ICU facility semdang.
Deputy Commissioner’er kidang senden ka amendang Sumi Hoho, Sumi Kukami Hoho, Sumi Totimi Hoho aser arogo lennirtem den senden ka amen.
Tsüngremi Nagaland kümzüka ayuba atema Rio-i tenüngsang agütsü.
“United States aser European linüktemia iba wara tulu ajanga kangshir, saka asenok Pa taochi aser tashi agi kümzüka ayur aser iba ya kuli tejangja lir” ta Rio-i ashi.
Civil society tem, Administration, Police, Medical department aser opposition-ia iba mapa nung yaritepba atema tenüngsang agütsür, ta Chief Minister-isa metetdaktsü.
Tsüngrem taochi ajanga asenok yashi dang nungi tanü terenemba lir. Iba lockdown mapang asenoki timtem aika ajurur, aser iba ajanga asenok sasa liyonga aotsü tangatetba asenoki angatetogo, ta paisa ashi.
Tanü Neiphiu Rio-isa Phek district semdangdang District administration, ketdangsertem aser NGOs den senden ka amen.
Nagaland ya tashi tashibo green zone nung lir ajisüaka asenok kümdanga alitsüla. Arogo lennirtemi kasa tebilemtsü bena yaritepba atema pelar, ta Rio-i senden nung jembidang ashi.
CM Rio-isa District Hospital Phek semdang aser COVID-19 atema mapa inyakba meyipa reprangshima liasü.
Nagaland CM Rio-i Phek semdangdang Dy. CM Y.Patton, Health & Family Welfare Minister S. Pangnyu Phom, Planning & Coordination and Land Revenue Minister Neiba Kronu, School Education Advisor K.T. Sukhalu, CAWD & NSDMA Advisor Kazheto Kinimi, MLA Kuzholuzo Nienu aser MLA Kezhienyi Khalo nungertemi pa meina liasü.
Senden nung Minister S. Pangnyu Phom, Minister Neiba Kronu, MLA Kuzholuzo Nienu aser CPO tir Mikha Kenye nungertemia o tatsütsü jembia liasü.