Nemnemba nung tebilemtsü – Tazüng. 1:26- 46

Aser lemsatepba agi süshia, amajok asüküm agi süshia, kecha teinyak. Filipi 2:3
Nemnemba! Asenoki ajaklen angashir – kibong nung, külem mapa inyakertem rongnung, asenok tembartem nungi aser arogo nunga. Ibai asenok mapang indoktsü mapa tajung amai ka lir. Saka tenyar Pauli nemnemshishia kecha mapa teinyak ta ajungshir. Pai amajok nung kecha meinyak (Fil. 2:14).
Maneni nemnembaji asenok asoshi majung ta Tsüngremi metet aser yimya agi ibaji mepelai atemer. Kodang Israel chirtem maneni nemnem, iba nungi adokbaji lendong liasü. Yihusua aser Kaleb dang tenangzükba limai aitsü mela.
Langkati asenok meinprongdang mesüra asenok bilemdang kechi inyaker? Pauli ashi, “Nenok tebang nungi O tamajung kata tadokdaktsü. Saka tenüngdaktsü amato kechi yangluloktsü asoshi tajung lir, tangashirtem nem taochi agütsütsü aji jembiang” (Ef. 4:29). Nemnemdang nungi asenoki Khristan süneptsütsü ta amanga, tangar dangi orr indangindanga ochishia, tasü itta aser temeim agi jembitsüla. Tanela teyari ajanga asenoki tenemnem Oji taochi O agi melentsü akok. Asenoki Yisu Khrista ain metaloka alir ta asenok tebangmechi aser taküm libaliro ajanga tangar dang sayutsü akok.
Kibuba Yisu, tanüsa kü nemnemshishi Otem taochi O agi melenjang. Amen.