Nenok Metsü

Nenok alima metsü, saka metsü dak tanang samadokra, kechi agi aji nüngdaktsütsü? Joko aji kecha sütsü masü, saka endoker nisung tetsüng agi ajemshitsüba lir. Mathi 5:13.
Tsüngremer nüburtemji alima wazüka ayurtem telok lir. Alima temenen agi raksaja aliba yanglushitsü aser kümzüka ayutsü asoshi Tsüngremi Khristantemji aja. Ne takümji lokti nung teraksa aliba endoktsü aser kechi shidak aser tajung lir aji wazüka ayutsü asoshi yok. Tanü lokti nung temeshi nisung ka alibaji kanga tongtipang lir. Ne dak Khrista aliba jagi tangar asoshi Khrista akaba ajak parnok nem kadaktsür. Pa tekümtet angati, teraksa kibong yanglushir, mejungi aliba anebtsür, lemang tezü nung alir agizüker aser temulung nung jashi alir süneptsür. Item ajakji na ajang ana meketa alir ajak dang Khristai Pa taküm sayur.
Saka asenok asen Kibuba den tesendaktep shidak melira Yisui ashi metsü dak tanang samadokba ama asenok alitsü, tagidak maka akümtsü. Tsüngrem taochi aser ain na ajanga tangar nem magütsütettsü. Asenoki asen taküm nung metsü tanangji koda tendangtsü? Asen kibong reprangang. Asenoki ibaji tamajung nungi wazüka yudar ma? Asenok mapa inyakdak tentangang. Asenok aliba ajanga tamajung teraksa sottar ama? Asenok lokti reprangang. Asenok atenba ajanga ibai tajungba kümdar ma? Asen arogo koda? Tsüngremi asenok amshiba ajanga tanelaren tajungba kümdar ma? Parnok tanelaren teraksa küma ora asenoki Kibuba dangi or parnok asoshi asen taküm amshiang ta asüngdangtsü akok.