Nenok Tesangwa

“Yamaji, nisungi nenok mapa tajung ngua, kotak nung aliba nenok Tebu sentsüwangshidaktsütsü asoshi, parnok madang nenok tesangwa jungkai adokdakjang.”- Matt. 5:16.

Ammang nung tesangwai ayaba nung kecha aibelen mali. Tesangwai tasü itta pa aliba kuli asür aser tashi itta ammangji aridoker. Tsüngremi na Pa tesangwa agi sünga lidaktsüner. Ne taküm nung Pa adenba aser Pa ain aliba ne taküm kuli agi jangja jangjaa nai kuli südaktsüner, idangji na meketa aliba takümtem nung ammang aliba Tsüngrem sentsüwangshi tesangwa jagi aridoktsür.

Aji oda süaka, alimaji tammangba tammangba akümer, ammangji taitsü! Ibaji ammangi kechi inyaktsüla aji inyaker dang. Ammang taneptsüji tesangwaji dang lir. Alimaji tammangba kümra, tebilemtsüji ammangji masü. Tebilemtsüji tesangwa nungji lir. Yisui Pa nütsüngtemji “alima tesangwa” asütsüla ta ashi (Matt.5:14). Koda tesüngmangtsü mapa- Tsüngremer tesangwa rongnung ka asütsü aser meketa alirtem nung ammang aridoktsüba! Pa arutsü metetdaktsüdang. Yisui ashi, “Ammang nung alirtemi sangwa tulu ka angu, aser tasür lima aser tasüba akhüm nung mena alir dangi sangwa adok.”

Yisu alimai arutsü memetetba mali asü ! Ammang süshidaktsür! Yisu aolen ajak nung tasü itta Tsüngremer ochiba sangdong, aser temenen pur taidok angu. Tebui Pa chir ajanga Pa tesangwa alimai bener arur külen alimaji akhi aliba ama mesüi aküm. Na atema yamaji shitettsü asü? Ne dak aliba tesangwaji külen inyakertemi angur asü? Ner kibong nungi Yisu aliba tesangwaji lokti nem tesangwa agütsür asü? Kodang na ajanga Tsüngremer tesangwaji nenok dangi yokdir aser sangwatsüdir, na meketa aliba ammangji süshitsü.