NEP 2020 & NBA Accreditation indang sentong agiogo

Dimapur, Tsüklai/February 16 (TYO): Directorate of Technical Education, Nagaland ajanga Officers, Principals aser Faculties tem atema National Education Policy (NEP) 2020 & National Board of Accreditation (NBA) indang ananü Conference-cum-Workshop sentong February 8-9, 2024 anogotem Directorate of Technical Education indang Conference Hall, Kohima nung ayongzüka agia liasü.

Iba sentong nung National Institute of Technical Teachers Training & Research (NITTTR), Kolkata nungi takotet nisungtemi shisalen sayua liasü.

Sentong nung Prof. Urmila Kar-i “NEP 2020 Policy and its Impact on Education System and Curriculum Model” indang onük nung jembi, koba All India Council for Technical Education (AICTE), Government of India, New Delhi ajanga yangluba lir.

Dr. Rayapati Subbarao-i AICTE approved Technical Institutes/Polytechnics ajunga nung NBA accreditation asütsü nüngdakba indang jembidang AICTE, GoI, New Delhi nungi scheme balala agiteter aser Technical Institutes tajungba kumdaktsür ta ashi.

Iba sentong nung Polytechnics indang principal temi PowerPoint presentation balala agüja liasü.

Er. Vipulhou Lhoungu, Director ajanga tajungshi o jembidang state nung Technical Education tali temaba jenjangi ajungketttsü asoshi dangar dang nungi tali inyaktsü ayongzük.

Tiakaba Amer, Additional Director ajanga pela agizükba o jembi aser Er. Khrieketoulie Rupreo, Controller of Examination & Programme Coordinator ajanga melepzüng o jembia sentong tembang.