NEP draft Dec ita sangdongtsü: Irani

New Delhi, September 19 (Agencies): Human Rescource Development Union Minister Smriti Irani-i, National Education Policy (NEP) mezüngbuba draft taküm December ita tashi nungbo sangdongtsü imlar, ta shiogo.
Agartala nung osangbenertem den jembidang Irani-i, national education policy (NEP) latettsü atema ajak den shisalemsatepa tangatettep nung grass root level nungi merangdagi, ta ashi.
Agartala nung Northeast state tem nungi education minister tem, education secretary tem aser tanga ketdangsertem senden nung jembidang lai, NEP latettsü atema sorkari tesayurtem, kaketshirtem, district magistrates aser lokti balala den jembitepa inyaker, ta metetdaktsüogo.
Hokolbar aonung Tripura Chief Minister Manik Sarkar ajuruba sülen osangbenertem den jembidang lai, “National Education Policy latettsü atema national nungi grassroot level tashi nung India sensotemi pei tebilemba lemsatepba ya tang mezüng asütsü. Iba draft ya December tashi nungbo renemtsü,” ta ashi.
Laisa, “Hokolbar nü Agartala nung northeast nung aliba state tiprongla nungi mezüngbuba regional senden kaogo. Tang benoka aliba NEP onük nung item state nungi education minister tem aser representative temi pei tebilemba lemsatepogo,” ta ashi.