Nepal: Anentsü agi yimtsüng 3 anenbang; 20 shi asü

Kathmandu, July 30 (Agencies): Nepal anülulentip tsütsü tenemlen tentetba Kaski district kübok yimtsüng 3 tashi anentsü agi anenbangba osang ka Nepal sorkar ketdangsertemi tanü Brehostibar nü metetdaktsüogo.

Tan lendong nung ishiba agi nisung 20 shi asüba aser ano, nisung aika yiruba osang tang tashi nung jangjaogo ta parnoki ashi.

“Tzünglu kanga sashia aruba ajanga Kathmandu yimtiba nungi kilometer 200 shi pilar, Lumle yimtsüng nung ali kanga sashia anenzükba osang jangjaogo,” ta Nepal’er National Emergency Operation Centre (NEOC) ketdangser kati ashi.

Anentsü lendong atalokba sülen rescue ketdangsertemi Lumle yimtsüng nung tasümang 14 tashi tanü tashi nung tuteta liasü ta ketdangsersangi ashi.

“Police aser mitkar ketdangsertemi samar aliba nisung 11 tashi maneni bushiba osanga jangjaogo,” ta Associated Press osangbener kati metetdaktsü.

Tan lendong atalokba region indang tongti yimti, Pokhara nungi lendong atalokba yimtsüngtemi aoba lenmang tesem aika nung anentsü aluba ajanga rescue ketdangsertemi lendong atalokdaki aotsü maparen nem timtem tulu agüja lir ta pai ashi.

“Tzünglua tanen makai alua tsüngsang kanga mejungi aliba yong helicopter tayimtsütema lendong atalokdaki moteti lir,” ta pai metetdaktsü.

Kidangsüa aliba Dudhe yimtsüng nunga anentsü agi anenbangba tasümang 5 tashi tutetba osang jangjaogo ta ketdangser tanga kati ashi.

Anasa aliba Baglung district nunga anentsü agi nisung 1 anensetba osang jangjaogo saka nisung asüba osangji timba akümtsü ta pai metetdaktsü.

Mei mapang tzünglu kanga sashia aluba ajanga Nepal kübok densemba tenemlen anentsü lendong aser Nepal anülulentip tsütsü lendenlen tzümetsüng lendong kümshi ataloker.