Nepal aser China na amalitep akangshir

Kathmandu, March 25 (Agencies) : Nepal aser China na tsüngda tesendaktep tali tashi itshitsü asoshi tenangzüktep agiogo.
Brihostibarnü China Defence Minister aser Councillor Chang Wanquan den senden ka amenba mapang Nepal Ato Kilonser Pushpa Kamal Dahal “Prachanda”-i kidanger linük, China inyakyim tenüngsanga liasü.
Nepal nung menoknok anokba sülen lokti aser rongsenkettsüng den defence tsütsü temelenshi adokdaktsüba nung China-i nungitba asoshi pelar, ta Prachanda-i ashi.
“Nepal-i teti ‘one-China policy’ asoshi bendanga agüja inyaktsü aser China anema inyakba mapatem anema nokdaktsü. Nepal-i linük ana tsüngda lenmang atema inyaktsü yongyar,” ta Ato Kilonseri ashi.
Silk Road Economic Belt aser 21st Century Maritime Silk Road inyakyim dang Belt & Road inyakyim ta ajar. Asia linüktem Europe aser Africa tesemtem den alemi shishilembaba lenmangtem ajanga sendaktepba ajanga shishilembatsü aser terenlok mapa inyaktsü mechi nung iba inyakyim ya 2013 küm China-i benok.
Iba mapa nung Taiwan aser Tibet nati tetsükdangtsü aika bener arujaka Nepal-i China nungitba asoshi Chang-i pelaba metetdaktsü.
Chang-i, linük anaprong nungi lenirtemi tesendaktep tali akangshitsü asoshi telemtetba agiogo, ta ashi.
China-i Nepal den teka amteper tangatettep ka nung linük anaprong ajangzüktsü asoshi inyaktsü mulunga lir, ta pai shisem.