Nepal Ato kilonseri anogo asemnü atema India linük semdanger

New Delhi, Rongchii (April) 06 (Agencies): Nepal Ato kilonser, K.P. Oli-i anogo asemnü atema India linük semdanga tanü New Delhi tonga aruogo; pai taküm Tsüklai (February) ita nung tanaben takok anguba sülenbo tang mezüng pai India semdanger.
Oli aser pa kinüngtsü, Radika Shakya na airport tonga arudang Union Home Minister, Rajnath Singh-i tena agizüka liasü.
Oli-i Ato kilonser, Narendra Modi ajurua senden amentsü aser Küptoknü delegation-level senden nung adentsü.
Züngsem 54 high-level delegation-i Oli meina aru, ta Nepal Foreign Ministry osang ka ajanga metetdaktsü.
Nepal leniri India semdangba mapang nung India aser Nepal nati aluyimba, research aser terenlok, shisaliok aser training dak sendakba densema onük aika nung tezüngzüktep kar agitsü imlar.
Linük anatisa Nepal nungi Indian ports tashi inland water navigation reprangshitsü aser Nepal yimtiba, Kathmandu tashi Indian railway atsülangtsü atema jembitsü.
Oli-isa G.B. Pant University of Agriculture & Technology aser Uttrakhand nung farming project- Breeder Seed Production Centre semdangtsü sentong lir.
Oli meina arurtem rongnung Foreign Affairs Minister Pradeep Gyawali, Industry Minister, Commerce & Supplies Minister Matrika Yadav, Physical Infrastructure & Transport Minister Raghubir Mahaseth, Chief Adviser to the Prime Minister Bishnu Rimal, MPs aser senior ketdangsertem densema lir.
2016 küm India-Nepal arrtsü nokdangba nungi Oli-i Nepal Ato kilonser menden toktsütsüsa akum. Nepal nunger aikati, arrtsü mokdangbaji ajanga India-i Nepal rongsenkettsüng jenjang raksatsüogo, ta India nem tai tonglokja liasü.
Nepal o India na tesendaktep tera mekonga kümer aliba mapang ka nung tang Nepal leniri India semdanger.