Nepal CIAA tekolakba Karki mapa nungi anendaktsütsü akok

Kathmandu, October 23 (Agencies) : Deobarnü Nepal Parliament nung Commission of Investigation of Abuse of Authority (CIAA) tekolakba Lokman Singh Karki mapa nungi anendaktsütsü atema olemtep akatsü benokogo. Iba olemtep ya Mongulbarnü akatsü. Karki ya Nepal machinery tsütsü kanga tasü tait nisung ka ta züngshir. Pai sorkar anema pa tashi amshia, yimsüser aser bureaucrat tem amokmerener ta tai tonglokja lir. Iba dak alia Supreme Court nungi pa dangi item tai atema osang agütsüdang Karki-i pa linük yimsüsüba temang ka nung tekolakba lir ta shia tetsükdaktsü aiben agütsür.
Pa mapa nungi anendaktsütsü atema olemtep akatsü shidi ya taoba Mongulbarnü Communist Party of Nepal (United Marxist-Leninist), main opposition party of Nepal aser tang yimsü tesüdak Communist Party of Nepal (Maoist-Centre) teloktem nungi MP 157-i mulunga züluba lir. Speaker Onsari Gharti-i Karki mapa nungi anendaktsütsü atema olemtep akatsü shidi arua aliba house nung sangoktsü aser iba olemtep aruyaa aliba Mongulbarnü akatsü metetdaktsü.
Pa mapa nungi anendaktsütsü temelaba agütsütsü atema house nung tentet ka tentetogo aser iba telok jagi Karki dang nungi pa anema tai tongloktsübatem atema telangzüba meshitsü.
Karki ya tesüiba mapang chubaatema inyaker ka liasü aser 2006 küm bureaucrat ka aküm. Chuba Gynandra Shah yimsüsüba mapang, 2006 küm Karki nem Chief Secretary mapa agütsü, ajisüaka pai Nepal nung tongtibang inyakyim nokdangtsü atema chuba nungitba ajanga iba mapa nungi anendaktsü. Iba sülen tongtibang party temi nungita 2013 küm pa Nepal anti-graft body nung shimok.
Ajisüaka pai party lenirtem dak mang ayangtsü tenzüka bureaucrats aser lenir aika anema aser Maoist telok anema ken o benokoktsü tenzük.
Anungji iba inyakyim ajanga party lenirtem animesüngtet kümdaktsü aser pa mapa nungi anendaktsütsü benok. Iba telemtetba ya hopta trok nunga matettsü. Pa mapa nungi anendaktsütsü inyakyim ya tang yimsü tesüdak CPN(MC) party-i nungita Communist Party of Nepal CPN(UML) aser main opposition party of Nepal na tekolak sür inyaker.
Nepal nung party tuluba Congress-i iba dak sendakba nung ano telemtetba kecha magi saka party Tir Sher Bahadur Deuba-ibo pa anendaktsü nung ajungtsü ta bilemer. Party-i nüburtemi memulungba meinyaktsü, ta Sher Bahadur Deuba-i ashi.