Nepal gari lendong nung nisung 26 asü

Kathmandu, March 10 (Agencies) : Nepal anüolen Jajarkot district nung bus gari ka tsükokba lendong nung asür tang tashi nung nisung 26 jangjaogo, ta Hokolbarnü osangbenertemi ashi.
Jajarkot Chief District Officer Krishna Chandra Poudel-i, Brihostibarnü Chhinchu nungi Jajarkot aoba gari lenmang nung bus gari ka lenkübokleni metre 200 mezüa lua ayong ka nung tsükokdang nisung 15 yangji asü, ta ashi.
Yirur aliba nisung 11 tashi mozü kidang oa asü, ta linük osangkaket nung shia lir.
Iba lendong nung yirur parnok nisung asem tashi ano tasü taküm tsüngda lir.
Iba bus gari ya Khalanga nungi apusoa Khara yimtaki aoerba liasü.
Iba bus gari nung yimtaklirtem sünga mena liasü aser lenküboklen metre 200 shi mezüa lur ayong ka nung anen. Lendongji Kathmandu nungi kilometre 250 km (mile 220) pilar atalok. Bus ji koma sür tsükokar ano mejangja. Nepal nung gari lendong atalokbatemji gari lenmang majungba aser gari junga anepalua mayuba ajanga lir.