Nepal-i loktiyimten nung ajemdaker yangluba linük temzüng agizükogo

Kathmandu, September 20 (Agencies) : Küm 65 tejaklen nungi tang putu nung linük ka akümtsü asoshi mapa tenzükba sülen Deobarnü Nepal-i loktiyimten nung ajemdaker mezüngbuba yangluba linük temzüng agizüka sayaogo.
Nepal nung alirtem longjemtsü atema yangluba linük temzüngji tir Ram Baran Yadav-i yimjak nung metetdaktsü. Ajisüaka taoba hopta ishika tsüngda iba mapa dak sendakba tatalokba balala nung nisung 40 shi taküm samaogo.
“Nepal nunger ajak taginüba aser takhangbatem iba linük temzüng nung enoksema lir. Iba mapang tajung asoshi Prime Minister Sushil Koirala kanga pelar” ta prime minister atema media adviser, Prateek Pradhan-ia tanü metetdaktsü.
Küm tenet tashi yimten yimsüsürtem tsüngda linük temzüng yangluba nung mangatettep adoka raratepyonga aru saka 2015 küm menoknok tesashi anokba ajanga parnok asüngsashidaktsü aser iba jagi tanü linük temzüng mapa küma renemtetogo.
Linük temzüng tasenba nung Nepal nung state tenet lemsatsü shia lir saka telok kari Nepal tanaben Hindu linük ka kümdaktsütsü merangba agi iba linük temzüng magizüker.
Taoba hopta ishika tsüngda nisungtemi linük temzüng anema lungkak aittsü tenzük aser parnokji azüoktsü Nepal ketdangsertemi army nem tashi agütsü. Lungkak aitertemi police kar tepset aser ibaji anema army-i mapa inyakdang nisung 40 den timba taküm laluogo.
Deobarnü Parsa district nung police-i linük temzüng anema lungkak aiter telok ka dak injang kahloktsüdang nisung ka kahset.
Iba tesem nung curfew alitsü ozüng agüja liasü saka Madhesi nunger meyirjang aika adenshir lungkak ait aser iba mapang police-i nisung ka kahset.
“Nisung meyirjang aika curfew ozüng alema yimdong nung adenshi aser parnok azüoktsü atema injang kahdokdang nisung ka kahset” ta Parsa nung chief district officer Kesheb Raj Ghimire-i ashi.
“Lungkak aitertemi lung aser glass bottle tem amshia sepaitem den rara. Iba mapang sepai kar yirua lir” ta Kesheb Raj Ghimire-isa ashi.