Nepal-i Madhesi nunger takhangba agizüka Temzüng melenshitsü

New Delhi, December 21 (Agencies) : Nepal sorkari Madhesi nungeri takhangba agütsüba onük tongti ana agizüka Linük Temzüng tasenba nung temelenshi kar alitsü telemtetba agiogo.
“India sorkari iba telemtetba pelaa agizüker aser iba ya ajanga Nepal nung mangatettep adoka aliba atema telemtetba tajung ka agitettsü imlar” ta Hombarnü External Affairs Ministry-i sangdong ka nung metetdaktsü.
“Nepal nung yimten telok ajaki tangatetba tajung nung aser haihaura kahtepa Temzüng dak sendakba onüktem angatetteptsü ayongzüker” ta MEA sangdong nungsa ashi.
Deobar aonung Singha Durbar nung rongdak cabinet senden ka jatepa agidang Nepal sorkari iba telemtetba agia liasü.
Nepal nung Linük Temzüng tasenba ajanga parnok tetsü-tebou lushi lemsatsür aser iba ya parnok teküpokba jenjang nung ayutsü atema lir ta aija, Nepal nung Madhes nunger telok balalai tesüiba ita pezü tashi lungkak aityonga arur.
Madhesi teloktemi Nepal-i India den shishilemba asüba tongtipang tesemtem noktanger lungkak aiter aser iba ya ajanga Nepal nung nüngdakba osettsüset aser mozütem menguteti timtemer.
Taküm August ita nung Madhesi nungeri lungkak ait tenzükba sülen tatalokba balala nisung 50 jungnüa taküm samaogo.
Madhesi nunger ya Terai tesem nung alir aser Nepal nütsüng yongsük nung parnok shilem noklang nung 52% jungnüa lir.