Nepal-i Saarc Summit tekaraba nung akatsü merangtsü

Kathmandu, October 2 (Agencies) : Islamabad nung 19buba Saarc Summit thinentsü atema Pakistan-i sangdonger anogo ka lir külen Deobarnü Nepal-i, South Asia nungi züngsem ajak den onoki tongteprateptsü aser iba senden tekaraba nung akatsü, ta metetdaktsü.
Nepal Foreign Ministry nungi ketdangser kati, Kathmandu-i Saarc züngsem ajak den tongtepa November 9 aser 10 anogotem nung akatsü aliba senden mapang tera atsüngzüker tekaraba nung agitsü jembiteptsü, ta ashiba Kathmandu Post ajanga metetdaktsü.
“Saarc mendendi ka ama Nepal-i iba senden tekaraba nung katettsüsa inyaktsüla aser senden akatsü tesem aser anogo Saarc züngsem nung alir linüktem den asüngdangtepa lemtettsü,” ta Nepal Ato Kilonser Pushpa Kamal Dahal atema Foreign Affairs Adviser, Rishi Raj Adhikari-i ashi.
Arrtsülen kiralongrartemi amakba tali küma linük nung tebilemtsü bener arutsüba ajanga Islamabad nung 19buba Saarc Summit takok ngua magitettsü ta shia India-i taoba Mongulbarnü iba senden nung madentsü metetdaktsüba sülen Adhikari item o ya jembi.
New Delhi-i iba telemtetba agiba nung Afghanistan, Bangladesh aser Bhutan linüktemi nungiter aser taoba Bodhbarnü parnoka senden nung medentettsü ta metetdaktsüogo.
Saarc züngsem 8 rongnungi Hokolbarnü Sri Lanka-a iba senden nung madentsü pur linük pongububa kümogo aser ibaji ajanga Pakistan nung akatsü aliba senden thinentsüsa akümer.
Honibarnü US nung UN General Assembly nung dener arusang Nepal Minister for Foreign Affairs Prakash Sharan Mahat-i, iba senden takok ngua akatsü atema Saarc nung züngsema aliba linük ajak den lemteptsü aser idangji tesem aser anogo ajak lemteta ayutsü, ta ashi.
Saarc-i iba ama tensa ya dangang ajurur masü. 2002 küma India aser Pakistan na tsüngda petsaprong adokba ajanga tensa süngjemdaktsütsü atema Nepal-i New Delhi aser Islamabad dangi diplomat yoka liasü aser iba senden khen lir ang iba senden aka.
September 18, 2016 nü Uri, Jammu & Kashmir nung India Army tesep maka sepai 19 tepsetba ajanga India-i iba senden nung madentsü telemtetba agi.