Nepal-i tayimtsü nung atsükba totzü tonne 66 Kolkata nungi belener ogo

Kathmandu, October 8 (Agencies): Madhes, Nepal nung aliba political party temi tesüiba hopta ana tashi India nungi aoba truck garitem linük telungi maitdaktsüba ajanga totzü agi meperi-i küma Kolkata nungi tayimtsü nung atsükba totzü tonne 66 tayimtsü nung belener ogo.

Madhes nung party balalai Kathmandu nung parnok nükjidong angatetdaktsütsü asoshi lungkak aita linük telungi aitba lenmang ajak mokdangba ajanga gari totzü agi kanga anünger.

Nepal nung tayimtsü jajaba manentsü meji Nepal Airlines, Boeing 757 ka amshia Nepal Oil Corporation (NOC) nung Kolkata nungi totzü belenokogo.

“Tanü belener aoba totzü ya linük nung jajaba tayimtsütem asoshi amshitsü,” ta Nepal Airlines managing director Sugat Ratna Kansakar-i ashi.

Linük nung tayimtsü asoshi totzü maliba ajanga bendanglen jajaba tayimtsütembo yangji totzü enoker arutsü mepishiogo.

Ketdangsertemi ashiba agi, lenmang aisülen nungi shisadanger sen kümzüktsü aser tesem anaba apia iba totzü Kolkata nungi bener arutsü lemteta liasü.

Tayimtsü totzü dang masü saka petrol, diesel, kerosene aser gas agia kanga anünga kümogo aser ibaji ajanga NOC-i alima dang bilema totzü agütsübaren nung yaridaktsü nüa sangdongogo.

Kathmandu nung aliba hotel aser restaurant aika nung süng amshi sorochioktsü tenzükogo.