Nepal moist teloktem lungjemer

Kathmandu, May 15 (Agencies) : Communist Party of Nepal ta tenüng amer Nepal nung küm ter shi ‘civil war’ rarartem, Nepal maoist telok nung züngsemtemi parnok anema ken o benoker aliba nung külemi nokdaktsü atema lungjemtsü tenzükdar.
Maoist telok yagi 1996 nungi 2006 tashi parliament inyakyim aser linük Chuba anema rara liasü. Iba rara ya November 21, 2006 nü Comprehensive Peace Accord (CPA) ka sign sütepba sülenang anen.
CPA nung inyakyim ana–Truth and Reconciliation Commission (TRC) aser Commission on Enforced Disappeared Persons (CEDP)— ajanga iba rara mapang akoksartem dang nungi kuli bendena parnok nem ochji obendang agütsütsü maongka lapokja lir.
Iba rara dak sentakba ken o ajak court nung masü saka TRC ajanga dang obendangtsü züngzüktepa lir.
2008 küm Constituent Assembly Election nung Unified Communist Party of Nepal (Maoist) party tuluba akümba sülen parnok telok trok küma lemdang.
Item teloktem yagi ken o ajak court nung masü saka TRC aser CEDP ajanga bendangtsü atema sorkar nem takhangba ka agüja liasü.
Item telok yagi ano tang UCPN (Maoist) telok küma lungjemtsü merangdar aser iba telok nung mendenbubaji Pushp Kamal Dahal (Prachanda) lir.
Onok hopta ka nung lungjemtettsü aser onok inyakyim nung yaritsü atema teinyaktsü 11-point aketba shidi ka renema lir, ta parnoki ashi.
Supreme court aser ano tanga court temi tesüiba rara dak sentakba ken o nung teka aittsü merangba ajanga onok UCPN (Maoist) kübok lungjemtsüsa aküm, ta Maoist lenir Dev Gurung-i ashi.
Iba civil war anenli ita ka tsüngda nung rara nung akoksartem-i TRC den ken o 6,000 dak tema benoka lir. Iba mapang maoist teloki nisung mashi tepset, tetsür tashiyim agi raksatsü, auya, rakzükraktem aser nüburtem kanga rishi kangshia liasü.
Yimjung meraksanera Pushpa Kamal Dahal ‘Prachanda’ aser telok lenir kar anema benoka aliba ken o tem court tem nungi ageinang, ta item telok trok yagi takhangba ka agütsüogo.