Nepal: Nisung 11 tashi anentsü agi anenset

Kathmandu, July 05 (Agencies): Nepal nung tzünglu kanga sashia aruba ajanga bener arutsüba anentsü lendong nung asangur chanu 1 aser  tetsür chanu 4 densema, nisung 11 tashi Nepal anülulentip tsütsülen anensetba osang ka police-i tanü, Mongolbar nü metetdaktsüogo.
Yasüng, Hombar aonung nungi tenzüka tzünglu kanga sashia aruba sülen tenemlen tentetba Pyuthan district nung anentsü lendong ataloktsü tenzük aser tanep tashi nung yimtsüng 2 tashi nung nisung aliba ki ana tashi anentsü agi anenbangba osang bushiteta liasü.
“Tzünglu kanga sashia aruba ajanga anentsü lendong atalokdaktsüba sülen tanep tashi nung kibong ana nungi ajak agi nisung 8 tashi pei kidang anensetba osang bushitet,” ta Pyuthan district police lenisang, Ranjit Singh Rathod-i osang jangjashitsü.
Tan anentsü agi anenseta asür rong nung Rajwara yimtsüng nungi apuani ka den par arishi küm 10 ser tekübok tain jala 3 aser Puja yimtsüng nung arishi küm 7 tain tetsür chanu ka densema, kibong ka nungi nisung 3 tashi anensetba osang bushitetogo.
“Police aser anameta alir nüburtemi aroki lungjemer tan anentsü agi anenseta asür tasümang ali telung nungi tutetogo,” ta Rathod-i shisem.
Ano, “Gorkha district nung nüburtem senzüba lenmang ka anentsü agi anenbangdang nisung 3 tashi tanep anensetba osang jangjaogo,” ta Gorkha police lenisang, Birendra Thapa-ia metetdaktsü.
“Lenmang anenbangdang anenseta asür rong nung arishi küm 45 aser 30 tain tetsür 2 aser arishi küm 15 tain asangur 1 densema, parnok 3 anensetba aser nisung 3 tashi yirua parnok mozükidangi anir oa anepaluba osang tang tashi nung jangjaogo,” ta Thapa-i shisem.
Mei mapang tzünglu kanga sashia aruba ajanga Himalayan tenemlen tentetba Nepal linük nung kümshi nisung jenti tzümetsüng aser anentsü lendong balala nung asüba osang bushiteta lir.
Kathmandu yimtiba nunga taoba hopta tzünglu kanga sashia aruba sülen kaketreju ka jirepa kaketshir 2 anensetba aser parnok 24 tashi yiruba osang jangaogo.