Nepal nung bus tsükok; Nisung 33 tsükset, 28 shi yiru

Kathmandu, August 15 (Agencies): Nepal linük tenemlen tentetba gari senzüba lenmang nungi lenkübokleni lua nübur anir senzüba bus gari ka tanü, Hombar nü tsükoka lendong atalokba osang ka sorkar ketdangsertemi metetdaktsüogo.
“Kathmandu yimtiba bushia aoba bus gari ka Arniko highway lenkübokleni lua tanü tsükok aser iba lendong nung ishiba agi nisung 33 tsüksetba aser nisung 28 shi yiruba osang tang tashi nung jangjaogo,” ta Nepal Home Ministry ketdangser, Chiranjivi Nepal-i metetdaktsü.
“Tan lendong atalokba ya küm ishika tsüngda nung ozü linük gari tsükokba lendong tesashitiba ajurur lir,” ta pai ashi.
“Lenkübokleni feet 500 shi lua tsükokba sülen bus-i anir aliba nisung aser khu aremlen merepshiba osang angazükogo,” ta shia, tanü lendong nung yirur nisungtemji helicopter tayimtsü agi Kathmandu tonga anir aoba sülen idakji tentetba mozüki ana tashi nung parnok anepaluba osang ka pai metetdaktsü.
Nepal mitkar aser police rescue ketdangsertemi tan lendong atalokdak, Kathmandu yimtiba nungi anüdoklen tsütsüleni kilometer 80 shi pilar, Deurali yimsüng anasa tenemlen tan lendong nung densemer nisungtem maneni bushiba osang ka Nepal-isa metetdaktsü.
Tan lendongji kechi timtem ajanga atalok iba osang tang tashi mejangjateti lir saka Nepal tenemlen tentetba lenmangtem junga anepalu masüba den külemi, tsüngsang majungba ajanga tan lendongji atalok südi ta ketdangsertemi temulung malemba olen ka metetdaktsüogo.