Nepal nung India anema lungkak ait

Kathmandu, September 28 (Agencies): Hombar nü Nepal yimtiba, Kathmandu nung lungkak aitertemi India Ato kilonser Narendra Modi mesükba noksa bener, kidanger linüki ronsenkettsüng lenmang mokdanger aser linük temzüng tasenba yangluba nung teka amouka inyaker, ta aitsüogo.
Taoba hopta Nepal Linük Temzüng tasenba sangdongba sülen India aser Neplal linük na tsüngda tensa tera mejungi kümogo. Temzüng tasenba agizükba anema south tsütsü minority teloktemi lungkak aiter.
Temzüng tasenba anema taküm August ita nungi tenzüka lungkak aitba mapang tang tashi nung nisung 40 dak tema süogo. Lungkak aitba ajanga India nunger totzü abenba truck tem Nepal telungi mair, aser ibaji ajanga ketdangsertemi totzü kümzüktsü atema gari kanga mamshitsü tuyuogo.
Tanü Central Kathmandu nung lungkak aiter 130 rongnung nurse training agir ka tenüng agi Amrita Baral-i, “Yimlibilema arrtsü lapokang aser Nepal linük onüktem nung taka mamoktsüla ta onoki India dang mepishir,” ta ashi.
Parnoki yimdong süa Modi mesükba noksa amer lungkak aita jajaba sülen Kathmandu nung aliba Indian Embassy-i ao.
Ajisüaka India-ibo, onoki rongsenkettsüng menokdanger saka lungkak airtertemi lenmang mokdangba ajanga truck tem Nepal telungi meiteter, ta shiogo.
Kathmandu nung alirtemi ashiba agi, tang tashi nungbo chiyungtsü mesüra totzü agi anüngba timtem mali, saka kobi melii iba timtem ajurutsü temaitsütembo lir.