Nepal nung Khristan 5 tepuokdak ayutsü obendang agütsü

Kathmandu, January 4 (Agencies) : Khristan tamanger pungui tekolok meshidak tetsür ka jungdaktsüba atema Nepali okadak kati par pungu dak tai tonglokja küm pungu tepuokdak ayutsü temerenshi agütsüogo.
Par pungu jagi ozüng alema mapa inyak aser arasenba mapa inyak ta aija okadaki iba obendang agüja liasü.
Yaküm June ita Seti Pariyar ta ser tekolok nung timtem aketba tetsür ka la kinungbo tebui tenlaki ka nung taneptsü angutsü atema yok.
Pariyar kinungbo tebuji Khristan tamanger ka lir aser la sentep nung adenba sülen kimai alu aser mapang tatsüka lir külen la anameta aliba arem ka nung ola tulu adoka asatena la sasa temang yirutsü meranga lia lia angu, ta World Watch Monitor-i metetdaktsü.
Iba tatalokba sülen ita ka shi lir, idakji aliba shishilembar kati local media dang iba osang ashi aser iba osang nung ajemdaker Bhisma Pariyar ta ser nisung kati Khristan tamanger pungu anema ken o benok. Police-i Khristan tamanger punguji apu aser Pariyar temulung meyipdaktsütsü merang ta tai tonglokja asüngdangya asütsü tenzük.
Pariyar aser la kinungbo nati district court nung nisung pungu jagi la dak tashiyim mesüra ozüng alema mapa kecha meinyak ta kuli agütsü. Parnoki sarasademtsüba ajanga la taneptsü angu ta Pariyar-isa okadak kuli agütsü.
Okatsürtem aser tanga Khristan lennirtemi merangaka, okadaki Khristan tamanger punguji arasenba, tashiyim agi pur ayuba aser tetsür dak ozüng alema mapa inyakba onüktem nung aija küm pungu tepuokdak ayutsü obendang agütsüogo.