Nepal nung Linük Temzüng tasenba anema nisung ka soseta asü

Kathmandu, September 21 (Agencies): Nepal nung Linük Temzüng tasenba anema noktakertemi lungkak aitba mapa ulushiogo aser Hombarnü Sadbhavana Party nungi züngsem ka soseta süogo.
Hombarnü Rautahat district kübok Garur chowk nung police-i injang kahdoktsüsa aküm aser Birgunj nung nisung ka kahset. Birgunj nung nisungtemi Linük Temzüng mi agi rongdoka lungkak aiter.
Ano, Kailali district kübok Lamki nunga bomb ka apok aser Mahabir Chowk nung police-i injang kahdokdang nisung 3 yiruba osang angazüker.
Nepal-i Linük Temzüng tasen agizükba nung India-i temelenshi kar alitsüla ta nenshia shiogo. Nepal nung Indian Ambassador-i Nepal nunger lennirtem dang iba onük sangoktsüogo.
Nepal-ia India dang Linük Temzüng tasenba mapa küma metenzükdang Madhesi nungertemi aginübatem benoka angadangtsü ta nangzükogo.
Taoba Nepal prime minister Prachanda aser Congress lennir Sher Bahadur Deuba nungertemi Prime Minister Narendra Modi dang Madhesi nungertem indang taginüba agizüka angadangtsü tenangzükba agiogo.
India aser Nepal arrtsü anasa aliba tesemtem nung linük temzüng tasenba anema mepetmesü adoka lir aser iba atemaji India-i kanga süoki ia bilemer.
Iba tesem nung Madhesi aser Tharu nunger lisopurtemi alir aser Linük temzüng tasenba ajanga parnok nem tashi magütsür.