Nepal nung Muslim nungeri ‘Hindu state’ akhanger

Kathmandu, August 12 (Agencies): Nepal nung Muslim nungeri par yimsü kümzüka ayutsü asoshi iba linük ya Hindu state ka ta sangdongtsüla ta khanga, secular state dang nungibo Hindu state ka kübok ang parnok (Muslim) kümzüka lir ama bilemer, ta shiogo.

Rapti Muslim Society mendenbuba aser Nepal nung Hindu state akhanger Amjad Ali-i, “Iba ya Islam yimsü kümzüka ayutsü asoshi lir. Ozü tamangba yimsü kümzüka ayutsü atema ni ola adoka, Nepal ya Hindu state ka lir ta sangdongang ta shiogo,” ta ashi.

CPN-UML CA züngsem Anarkali Miya-i, missionary temi tanga tamangba yimsü nungi Khristan dangi meyipdaktsütsü asoshi inyakba lai ajangshiogo, ta ashi.

“Nepal-i secularism magizüktsüla ta ni bilemer. Iba ya ajanga tarutsü nung timtem timba bener arutsütsü,” ta Miya-i ashi.

UCPN (Maoist) den affiliate süa aliba Muslim Mukti Morcha mendenbuba Udbudhin Fru-ia Nepal nung Khristan tamanger züinba indang jembiogo.

“Iba linük secular akümba ya tanga kecha masü, saka mapang talang ka nungi Hindu aser Muslim longjema aliba raksatsütsü asoshi lir,” ta Rastrabadi Muslim Manch Nepalgunj Mendenbuba Babu Khan Pathan-i ashi.

“Onoki secular maitsü ka menüngdaker, saka iba linük ya Hindu State ka südaktsüner, kechiyong ibaji ajanga ajak atema security alitsü,” ta paisa ashi.

Pathan-i ashiba agi, Banke nung Muslim nunger shilem 80-i Nepal ya Hindu state ka südaktsüner, ta ashi.

Nepal nung Linük Temzüng tasen ka yanglutsü sentong lir aser Rastriya Prajatantra Party Nepal den tanga Hindu tentettemia Nepal ya Hindu linük ka asütsü asoshi nüboyimer.