Nepal nung sayutsüngitsü memelar

Kathmandu, October 27 (Agencies): Nepal president-i tawa tu sayutsüngiba aser tamangba yimsü melenbaji ozüng alema inyakba mapa ka asüba bill ka nung sign süogo.
Nepal President, Bidhya Devi Bhandari-i sign asüba ozüngji ajanga sayutsüngiba aser tamanga yimsü melenertem küm 5 tashi tepuokdak ayutsü.
October 16, 2017 nü Bhandari-i ozüng tasenji agizüka liasü. Taküm August Nepal MP temi sayutsüngiba aser tamangba yimsü melenba anema bill temji agizüka liasü.
Nepal nung tamangba yimsü balala nungi lennirtemi iba ozüng tasen magizüker ta ashir aser iba ya tamangba nüjiso anema lir ta aitsür.
“Iba bill ajanga ozüng akümba atema onok mepelar. Onoki president aser sentong atongertem dang iba ozüng yanglushitsü mepishiba magizük. Nepal sorkari iba ozüng yangluba ajanga asenok tebilemba lemsatetba aser tamangba yimsü nüjiso alenbanger” ta Pastor Tanka Subedi-i ashi.
Pa ya Dharmik Chautari Nepal & Religious Liberty Forum Nepal indang founding member anaser mendenbuba lir.
India aser Pakistan ama tanga linüktemia anti-evangelism, anti-conversion aser blasphemy ozüngtem yanglua lir.