Nepal nung taruba hopta Tir tasen shimtsü

Kathmandu, October 18 (Agencies): Nepal nung taoba Deobar nü ang Ato Kilonser tasen shimer aliba mapang ka nung ano taruba hopta Tir tasen ka shimtsü sentong lir, ta ketdangsertemi Kathmandu nung metetdaktsüogo.
Parliament Secretariat sangdong ka ajanga, “October 24 nü tatar hoho (parliament) senden amendang Tir aser Tatong Tir tasen shimtsü asoshi maparen tenzüktsü,” ta ashiba Xinhua news agency ajanga metetdaktsü.
Nepal Temzüng, 2015 kübok arrla 297 nung aliba ama tatar hoho senden tenzüker ita ka tsüngda nung Tir aser Tatong Tir shimtsü.
Linük nung Temzüng tasenba September 20 nü metetdaktsüba sülen mezüngbuba senden October 2 nü kaa liasü anungji Temzüng nung aliba ama tan ita tatemlenbosa Tir tasenba shimtsü.
Nepal tatar hoho nung züngsem 598 lir, anungji linük Tir menden asoshi toktepertemi tajemba agi vote 299 angu nung dang iba menden nung mentettsü.
Tan Tir tasenba shimsang jagi tang aliba Tir, Dr. Ram Baran Yadav melentsü. Linük nung chuba yimsüsüba ageiner külen, July 23, 2008 nü Dr. Ram Baran Yadav ya linük asoshi mezüng tir ama shima liasü.
Nepal tatar hoho ajanga October 11 nü Communist Party of Nepal (Unified Marxist-Leninst) nungi K.P. Sharma Oli, Ato Kilonser asütsü shimba mapang Speaker asütsü Onsari Gharti Magar shim. Himalaya tenemtsü nung aliba linük, Nepal asoshi la ya tetsür rongnungi mezüng Speaker asütsü.