Nepal nungi mozü shibelener telok ka Bengaluru nung apu

Bengaluru, March 05 (Agencies): Bengaluru nung Mico Layout police-i temesepba mozü shilener telok ka nungi Nepal nunger ka densema züngsem pezü puogo, aser parnok ket nungi sen lakh 27 jenjang Charas aser marijuana puogo.
Parnok ket nungi charas seret 2.7 aser marijauna seret 5.3 apu.
Police-i ashiba agi, item mozüji Nepal nungi Delhi adena Bengaluru-i shibelen. Tang pua alirtem jagi item mozüji plastic asem nung alepba sülen menjang ama reprangdaktsütsü atema ano plastic taseptsü ka nung asep. Parnoki item mozüji Uttarakhand arrtsü ajanga Delhi-i bus nung bener aru.
Delhi nung parnoki mozüji kar ayokba sülen tanüngba mozüji train ajanga Bengaluru tonga shibelen.
Tang pua alir rongnung Nepal nunger Ashok Bahadur ji küm ka tejaklen Bengaluru yimtii arua liasü. Iba sülen pa nija company ka nung security guard inyak. Iba mapang nung pai Bengaluru nung ozüngi memelaba mozü jenti yoktettsü ta shisateta liasü.
Item mozüji Nepal yimtsüngtem nung jenti tsünüteter, anungji iba mapang nungjagi tenzüka pai temesepba mozütemji India-i shibelena liasü.