Nepal Parliament-i tanü Tir tasenba shimtsü

Kathmandu, October 27 (Agencies): Taoba September ita agizüka ayuba linük temzüng tasenba nung ajemdaker Nepal parliament-i asüng, Bodbar nü par Tir tasenba shimtsü sentong renema lir.

2008 küm nungi tenzüka Nepal linük nung democracy yimsüsütsü yimya benshitsü tenzükba sülen par linüki tan agi Tir tanabuba shimtsü sentong renemer lir.

Par linüki 2008 küm mezüngbuba election agiba sülen par Tir inyaktsü asoshi Ram Baran Yadav shima liasü.

Nepal nung tentetba yimtenren teloktemi atazüktsüba mapang nung Tir menden bendaktsütsü asoshi tapet candidate meshimtetba yong par parliament-i Tir tasenbaji vote agia shimtsü asoshi tan sentong renemer lir.

Aji oda, 2015 Nepal Constitution nung ajemdaker parliament züngsemtemi par Tir aser Tatong Tir naprongla vote agia shimtsü terenemshiba agitsü tenzüka lir.

Tir menden abentsü asoshi Communist Party of Nepal (Unified Marxist-Leninist) nung Vice Chairperson, Vidya Bhandari-i candidate ka ama tanü pa tenüng benokogo.

Ano, Unified Communist Party of Nepal-Maoist telok nungia Tir menden abentsü asoshi Vidya Bhandari tenüng benokba osang jangjaogo.

Bhandari-i asüng election nung takok ngua Tir menden abentsü maongka ngura, la ya Nepal nung mezüngbuba tetsür Tir akümtsü.