Nepal PM-i Madhesi Morcha dang election menokdangtsü ashir

Kathmandu, April 21 (Agencies) : Madhes kübok aliba party tenet rongnung ka, Samyukta Loktantrik Madhesi Morcha-i sorkari mepishiba ama taruba ita local level election nung shilem magi nungbo kangasa takoksa ajurutsü, ta Hokolbarnü Nepal Ato Kilonser Pushpa Kamal Dahal-i metetdaktsü.
Samyukta Loktantrik Madhesi Morcha (SLMM) den Madhes dak amendaker aliba party temi Brihostibarnü parnok senteper party tasen ka tentetba sangdongogo. Iba party tenüng parnoki Rastriya Janata Party (RJP) ta aja. RJP nungji parliament nung menden 25 lir aser ibaji ajanga tang parliament nung parnok züngsem timtiba aliba party ka kümogo.
CPN (Maoist Centre), Birtamod, Jhapa, nung election nübuyim sentong ka nung Dahal, shiba Maoist party nunga mendenbuba lir, pai, Morcha tem tebilemtsütem den sorkari akokba tashi agi lenji oa yaritepa election agitsü asoshi inyaktepogo, ta ashi.
Ato Kilonser Dahal-i May 14, 2017 nü agitsü aliba election nung tang shilem magitsü ta ashiba teloktema shilem agidaktsütsü merangtsü, ta ashiba osangbenertemi ashi.
Morcha lenirtemi tan election nung shilem maginungbo iba telemtetba jagi parnok ang akoksatsü aser parnok akhüm mali akümtsü, ta Dahal-i ashi.
Morcha-i election nokdangtsü merang nungbo nüburtemi parnok sendoktsü, ta pai ashi.
Tan agitsü aliba election ya khen nung dang tembanga agitsü, ta paisa ashi.
Iba sülen tang yimsü tesüdak Nepali Congress (NC) aser CPN (Maoist Centre)- aser Madhesi Morcha lenirtem Hokolbarnü ajurutepa senden ka amenba mapang iba election shilem ana lemdanger agitsü renema jembi aser iba dak sendakba temzüng ozüng Baluwatar nung Ato Kilonser’er kidang renem.
Lenirtem ya ano khen ajuruteptsü bangjemer senshi.
Senden nungji party anaprongi pei bilemba kija aginüa nokdaktep. Morcha lenirtemi tang yanglua aliba temzüng ozüng tasemtemji khen reprangshitsüla ta ashi, saka Ato Kilonseri iba nungji hai haora maka. Pai party ajak dang tan election nung shilem agitsü tetuyuba agütsü, ta osang ajanga ashi.