Nepal PM, Koirala-i UN senden nung shilem magitsü lemteter

Kathmandu, September 23 (Agencies): Nepal Ato Kilonser, Sushil Koirala-i taoba mapang renemba ama, United Nations General Assembly (UNGA) senden nung shilem magitsü lemtetba osang ka par otongdar, Prakash Adhikari-i tanü Bodbar nü metetdaktsüogo.
Nepal linük temzüng tasenba agizüktsü memulungertemi hopta ka dak tema longkak kanga sashia aitba ajanga nisung 40 dak tema tepseta tensa kanga mejungi kümdaktsüba azüoktsü nükjidong nung Koirala-i UN senden nung shilem magitsü telemtetbaji agiba osang jangjaogo.
Nepal nüburtem rong nung mangatettep adoka küm aika tensa mejungi arubaren agientsü nükjidong nung Nepal-i linük temzüng tasenba agizüktsü onük taoba Deobar nütu benok saka province-tem indang arrtsü latetbaren magizükteti Nepal anülulentip tsütsü alirtem tang kanga jashia aliba osang bushiteta lir.
Koirala-i tan New York yimti nung amentsü ayongba UNGA senden nung shilem magitsü lemtetba ajanga Hindu chuba kibongi küm 239 tashi yimsüsüa arur külen 2008 küm nungi tenzüka democracy yimsüsütsü yimya benokba Nepal linük nung tang tensa kanga mejungi aliba kuli tejangja angur.
“Ozü lenisang, Koirala-i New York nung amentsü ayongba UNGA senden nung shilem magitsü lemtetogo. Ajisüaka, ozü Deputy Prime Minister, Prakash Man Singh-i Koirala melena UN senden nungji shilem agitsü renema lir,” ta Adhikari-i osang jangjashitsü.