Nepal Temzüng tasenbaji India atema tepela asütsüla: India

Kathmandu/New Delhi, September 19 (Agencies): India den arrtsülen aliba Nepal district tem aika nung Madhesi teloktemi Nepal Temzüng (Constitution) tasenba anema lungkak sashia aitba dak sentakba nung tanü India-i, Nepal linük Temzüng tasenba maparen tembanga inyaktetbaji India atema rara masü saka tepela mapang ka asütsüla, ta shiogo.
India Foreign Secretary, S Jaishankar-i anogo ananü atema Nepal semdanga alir aser tanü Nepal yimtiba, Kathmandu nung pai, “India-i mapang ajak nung Nepal nunger linük temzüng tasenba yangluba maparen kanga pusema aruogo, aser iba maparen tembanga aruba ya rara aser lungkak aitba mapang ka masü saka tepela mapang ka onoki südaktsüner,” ta ashi.
Tanep Nepal atema Indian Ambassador Ranjit Rae aser Jaishankar nati Tribhuvan International Airport nung osangbenertem den jembiba mapang Jaishankar-i item o jembi, ajisüaka osangbenertemi asüngdangbabo tenati melangzü.
Yashi Jaishankar-i Kathmandu nung Nepal tongti lenirtem ajuruogo aser pai, linük temzüng tasenba sangdongba mapang tip ajaklen nungi tebilemtsütem onük benoktsü nüngdak, kechiyong ibaji ajanga yimjung aser terenlok nung yaritsü, ta shiogo.
Asüng Nepal nung linük temzüng tasenba sangdongtsü lia Nepal south tsütsülen Terai lungkak aitba mapang ka nung Foreign Secretary-i item o jembiogo.
Jaishankar-i Nepal Tir Ram Baran Yadav aser Ato kilonser Sushil Koirala na densema yimtenren lenir aika ajuruogo. Paisa tarutsü nung Nepal Ato kilonser akümtsü ta imlaa aliba aser CPN-UML Mendenbuba K P Sharma Oli aser UCPN-Maoist tongti lenir Prachanda nata ajuruogo.
Indai nunger ketdangserisa lungkak aiter Terai lenir Mahantha Thakur, Merai Madhes Democratic Party Mendenbuba Upendra Yadav aser Madhesi Peoples Rights Forum Democratic Mendenbuba, Bijaya Gachhadar nungera ajuruogo.
Asüng Kathmandu nung sentong ka ayongzüka Tir Yadav-i linük temzüng tasenba sangdongtsü sentong lir.
Democracy atema küm 66 tashi meranga rara aruba sülen Nepal nung nüburtemi züluba temzüng tasen sangdongba benjungmung nüngtem nung nüburtemi light tesangwa sentsü balala nung tsüklokang ta Nepal lenirtemi mepishiogo.
Ajisüaka lungkak aiter Madhesi teloktemi parnok takhangbatem temzüng nung meinoksem, anungji southern plains nungbo light metsükloktsü, ta shiogo.

You must be logged in to post a comment Login