Nepal Tir Bidhya tenangzükba agiogo

Kathmandu, October 29 (Agencies): Nepal nung tang mezüngbuba tetsür Tir, Bidhya Devi Bhandari Brihostibar nikongdang tenangzükba agiogo.
Presidential Palace nung Chief Justice, Kalyan Shrestha-i ketdangsüa la nem tenangzükba agidaktsü, ta Xinhua news agency ajanga metetdaktsü.
Bodhbar nü Tir menden atema vote agitepba mapang Bhandari-i Nepali Congress candidate, Kul Bahadur Gurung madak takok ngua iba menden angu.
Taoba ita Nepal nung linük Temzüng tasenba agizükba sülen Nepal linük nung tang mezüngbuba tetsür Tir, Bidhya Bhandari shima liasü.
Taoba mapang Defence minister, Bhandari ya cancer tashitak nungi taneptsü angur ka lir aser la ya Communist lenir asür, Madan Bhandari kinüngtsü liasü. La kinüngbu Madan 1991 küm tang tashi mejangjatetba gari lendong ka nung asüba sülen tanur ana tetsü Bidhya-i Parliament menden nung takok ngua liasü.
Tang linük nung Republican Federal Constitution tasenba September 20 nü agizükba sülen Tir aser tatong Tir tasen, Ato kilonser, Parliament Speaker aser Deputy Speaker ajak tasen shimtsüsa aküm.