Nepal ya Hindu linük ka asütsü benokba magizük

 

Kathmandu, September 14 (Agencies): Nepal ya ‘Hindu linük’ ta sangdongtsü atema benoka aliba onük tanü constituent assembly-i magizük, aser parnoki, Hindu nunger timba aliba linük ya maneni tamangba yimsü den tesentaktep maliba linük asütsü, ta sangdongogo.

Hindu National Democratic Party Nepal-i Nepal ya Hindu linük ka akümtsü atema Linük Temzüng yanglushitsü onük benoka liasü, aser ibaji assembly nung asemsü nungi anasüi magizüki linük ya maneni secular asütsüla, ta shiogo.

Assembly Mendenbuba, Subas Chandra Nembang-i, iba temepishiba magizük ta sangdongba sülen National Democratic Party Nepal lenir, Kamal Thapa-i ‘split vote’ atema takhangba agütsü.

Thapa-i vote atema mepishibaji tatar menden 601 aliba assembly nung tatar 21-i dang pusema liasü. Constituent Assembly temzüng nung ‘split vote’ atema tatar züngsem 61-ibosa pusemtsüla, ajisüaka tatar 21-i dang pusemba ajanga vote magitepi liasü.

Tamalen Hindu linük aliba, Nepal ya 2006 küm nüburtemi mapa inyakba ajanga kibong kati yimsüsüba agien aser iba sülen 2007 nung secular linük aküm.

Taküm July ita nung nüburtem taginüba asadangba ka ajanga ‘secular’ masü saka “Hindu” mesüra “religious freedom” olong aginüa liasü.

Iba temepishiba magizükba anema linük yimtiba Kathmandu, New Baneshwar tesem nung lungkak aita Hindu züngsem kari wakong aser temeremso sentsü nisan amer security sepaitem den raratepa liasü.

Iba dak alia lungkak aitertemi United Nations meyong gari ka densema gari kar raksatsü.