Nepali nunger lima

Nepal nung dang masü saka India nunga West Bengal state kübok Darjeeling, Dooars, Siliguru aser Kalimpong ta ajaba tesemtem ya Nepali nunger lima lir. Ajisüaka, parnoki aginüba ama India nungsa süaka state balaka mekümtetba ajanga tanga Darjeeling aser Kalimpong nungbo  Gorkha Janmukti Morcha (GJM) teloki anir Gorkhland state meshia longkak aitba agi nisung anabo süogo aser tensa kanga mejungi lir. West Bengal nung alir Nepali nungertemi parnok temeja aliba tesemtem agi Gorkhaland state kümner, kechiyong parnok ya Bengali nunger masü, anungji tereprangtsü, achiajem, oshioben aser  sobaliba balala lir. Atangji, India nung alir Nepali nungertemi parnok asoshi yimten sabang balaka  meshiba ya tanü tasen masü. 1907 küm Nepali nungertemi akümba Hillmen’s Association of Darjeeling teloki Minto-Morley Reforms committee nem Darjeeling ya yimten balaka ser linüba tejangraba metetdaktsü. Iba sülen 1917 küm kasa teloki  Bengal government nem Darjeeling aser Jalpaiguri district na ya külem ser yimten balaka kübok yutsütsüla ta takangba ka agütsü. Iba sülen 1929 küm kasa Hillmen’s Association telokisa Simon Commission nem kasa takangba ken o agütsü. Iba sülenji 1930 aser 1941 küm Gorkha nungertemi parnok Bengal province nungi balaka razüka orr yimten balaka kümnüba ken o benokpet benoka jembia aru. Aji oda, India nüjiso akümba mapang 1947 küm Communist Party of India-ibo Darjeeling District aser Sikkim na külem ser Gorkhasthan akümtsü asoshi Pt.Jawaharlal Nehru nunger nem takangba agüja liasü. Ajisüaka, Nepali nungertem tejangraba aser parnok temetenji junga mangadangi parnokji West Bengal state kübok dang yutsü. Ibayongji, mapang talangka ola madokteti aruba sülen, West Bengal nung Jyoti Basu chief minister  asüba mapang, Nepali nungertemi tangar sobaliba kübok alitsü maremteti 1986 küm Subhash Ghisingi anir Gorkha National Liberation Front (GNLF) teloki Gorkhaland state meshia apuso. Iba longkak aitba mapang Nepali nunger 1200 shi asü. Iba sülen state balaka mesüaka 1988 küm Darjeeling Gorkha Hill Council aküm aser Nepali nunger asoshi state balaka meshiba otsüji khen atema yangji anena liasü. Ajisüaka, 2007 küm Bimal Gurungi anir GNLF telok toktsür telok tasen ka tenüng agi Gorkha Janmukti Morcha tentet aser anosa Gorkhaland state akümtsü takangba agüja apuso. Ajisüaka, idangjia state akümtsü melen Gorkhaland Territirial Administration ta ser autonomous yimten sabang ka tentet aser yangji Bimal Gurung tekolak aküm. West Bengal nung ya Nepali nunger lakh 14 shi lir aser parnokji Bengali nunger masü, anungji Bengali nungertem den sobaliba kenyongi balala. Iba amaji mulung animesüngzükteti alidang, Trinamool Congress teloki aniba West Bengal government-i Darjeeling nunga dena kaketreju ajak nung Bengali oshi kangtepa agitsü ta sangdongba ajanga ano Nepali nungertemji tali jashidaktsü aser tang ano Gorkhaland state nüngdakba onük benoka longkak aittsüsa kümogo. Gorkhaland asoshi nokdakertem ya Nepali nunger kija masü saka linük nung parnok nungiter aika lir.Taküm 2017 küm April 04 nü Indian Law Institute, New Delhi nung ‘Conference for Regional Justice’ alidang Rashtriya Adhikar Manch teloki India nung aliba Gorkha (Nepali) nunger asoshi tekaratiba nung state balaka akümtsü asoshi nungiter ta metetdaktsü. Iba mongdang nung Union minister of State for Social Justice & Empowerment den Live Values Foundation, Telengana Joint Action Committee, Indigenous Peoples’ Front of Tripura, Dehat Morcha, Akhil Bharat Hindu Mahasabha, Shiv Sena, Small States Federation aser All India Lawyers’ Association teloktem ajak longjemer West Bengal kübok aliba Nepali nungertemi state balaka akümtsü akangba onük nung pusema nokdaktsü lemtet. Iba denji ano Supreme Court Bar Association aser Delhi High Court Bar Association nungertemi Gorkhaland akümtsüba maparen nung nungittsü lemtet. Ibaji dang masü saka GJM ya BJP teloki aniba NDA telok nung dena lir. Item ajakji GJM tashi angudak lir. Atangji West Bengal nung alir Nepali nunger asoshi Gorkhland akümtsübaji kang langa lir, anungji kümdaktsütsüla.