Ner chirnur meimra Modi nem vote tagutsü: Arvind Kejriwal

New Delhi, January 29 (Agencies): Delhi Chief Minister, Arvind Kejriwal-i, nüburtemi Aam Aadmi Party nem vote agutsütsüla, kechiyong BJP-i masü saka AAP-i school kitem yanglutsür, ta ashi.
Yashi Sarvodaya Kanya Vidyalaya nung AAP tongti lenir, Arvind Kejriwal den Deputy Chief Minister, Manish Sisodia nati Delhi nung aliba school 250 nung class takdang tasen 11,000 yanglutsü atema lung azüngja liasü.
Iba sentong nung jembidang Kejriwal-i, “Nai nisungtem dang, nai shiba nem vote agutsütsü? ta asüngdangra parnoki Modi nem agutsütsü ta ashir. Kechiba?, ta asüngdangra parnoki Modi meimba ajanga, ta langzütsü. Iba telemtetba ya agiang- nai ner chirnur asü Modi meimer. Nai ner chirnur memeimra Modi nem vote agujang. Modi-i nenok atema school ka danga meyanglutsü. Modi shimdokang mesüra Modi shimang. Anaprong inyaktsüjibo tamakoktsü,” ta ashi.
Kejriwal-i jembiba oji Delhi nung aliba school 700 nung live sayua liasü.
Delhi nung AAP sorkari 2015 aser 2018 küm class takdang tasen 8,000 yangluja liasü, aser tang agi tanabenburen nung class takdang 11,000 yanglutsütsü.
Ano Sisodia-ia, yimtenren nung shisaliok medendaktsür, aser iba kuliji ajanga linük nung sorkar school tem jenjang kanga majunger; yimtenren nung shisaliok dendaktsütsü mapang tongogo, ta ashi.