NER nung arem chidokba, shikariba, tzü-mopung menenba tebilemtsü lir: Advisor Tongpang

Kohima, Yimpoksüi/Nov. 07 (TYO): Arem chidokba, shikariba, tzü-mopung menenba, tzü-mopung melenba aser iba ama nisunger inyakyim balala ajanga North Eastern Region (NER) indang ecosystem nung timtem ajurur, ta Advisor, Water Resources, Govt. of Nagaland, Tongpang Ozukum-i ashi.

Capital Convention Centre, Kohima nung ananü ‘North East India Youth Leaders Conclave’ sentong tenzükba nung tongti tesemdanger ka ama jembidang, North East region nung alima tebour tajung, takümliruren (biodiversity) aser sobaliba tajung moaja lir, ta Advisor Tongpang Ozukum-i ashi.

Ajisüaka arem chidokba, shikariba, tzü-mopung menenba, tzü-mopung melenba aser iba ama nisunger inyakyim balala ajanga ecosystem nung timtem ajurur, ta pai ashi.

“Asen ecosystem nung teimla asenoki meteta lir aser asen jakdang tayongzükba aliba asenoki meteta lir, anungji iba ama lokti adenshiba nung item ken o nung jembishinü akatsüla aser region indang biodiversity wazüka ayutsü asoshi mera yanglutsüla,” ta pai ashi.

NER nung takümliruren peria moatsüba dang masü saka sobaliba balala lir, aser region indang takümliruren ajanga asenok melemsadaktsütsüla saka asen ajangzüktsü asoshi amshitsüla, ta ashi.

Asenoki ‘eco-friendly infrastructure’ yanglutsüla, aser region nung sempet tulu lapoktsüsa nüburtem dak amendaker tourism asoshi inyaktsüla, ta pai ashi.

Iba atema pai lanur lenirtem dang region indang loktiliba aser yimtenren angateta ‘ethnic tilerance’ ajungkettsü, sobaliba balala agizüktsü, kati ka takum yimya angatettsü aser yimjung nung alitsü ayongzüka liasü.

Nagaland dak sendakba nung, sorkar mapang maka kumogo aser sorkari nübu tasen shimba ajemtsü meranger saka yimya aser mapa tasen, skill development technology aser entrepreneurship nung rangloker, ta Advisor Tongpang-i ashi.

COVID-19 pandemic ajanga asenok ali dangi meyipa oa meranga inyaktsü aser akhi yimya nung modern technology amshia alu ayimtsü angatetdaktsü, ta ashi.

Iba atema CM Neiphiu Rio kübok state sorkari lanurtem rongnung entrepreneurship tasen adokdaktsütsü mechi Chief Minister’s Micro Financing Scheme tenzük, ta ashi.

Tang aliba danga central schemes tem den külemi CMMFS aser danga scheme balala amshia state aser region nung rongsenketzüng melenshidaktsütsüla, ta pai ashi.

Iba mungdang nungi tajangzük adoktsü teimla nung Advisor-i NER nung sempet/teimla lir aser mekongshi aliba rongsen aser nüburtem aser region indang sempet amshitsüla, ta pai ashi.

“Empowering Youth Leaders: Bridging SDGs and inclusive socio-economic development” omen nung ajemdaker ayongzükba mungdang nungya Sikkim densema North Eastern states ti nungi teshimtet nübu 100 adener.

Iba sentong ya National Foundation for India (NFI) ajanga Department of Youth Resources and Sports (YRS), Government of Nagaland den lungjemer ayongzük aser European Union ajanga iba sentong asoshi senotsü teyari agütsür aser NEIMUN ya shisatsü aser technical partner lir.

Executive Director of NFI, Biraj Patnaik ajanga sentong tenzüka jembi aser Development Consultant, Local Public Sector Alliance, Washington DC, Limabenla Jamir ajanga tarur pela agizükba o jembia liasü.

Kasa sentong nung Director, Youth Resources & Sports, Nagaland, Kethosituo Sekhose-i ‘Fostering Inclusive Development in North East India – Role of Young Leaders’ onük jembia liasü.