NERFFSO-i Ato kilonser dang lenmang yanglutsü mepishir

Kohima, Luchii/December 11, 2018: Tanü Raj Bhavan, Kohima nung North East Region Freedom Fighter’s Successor’s Organisation (NERFFSO) züngsemtemi Nagaland Angh, PB Acharya ajurudang pa den külemi tangokba noksa nung angur.

Kohima, Luchii/December 11 (TYO): Luchii/December 11, 2018 nü Raj Bhavan, Kohima nung North East Region Freedom Fighter’s Successor’s Organisation (NERFFSO)-i Netaji Subhas Chandra Bose bilemteta pa nüngtem nung Kohima nung gari lenmang yanglutsü atema Nagaland Angh, PB Acharya ajanga Ato kilonser, Narendra Modi nem temepishiba shidi ka agutsüogo, ta PRO to Governor sangdong ka nung metetdaktsü.
Temepishiba shidi nungji NERFFSO-i, Netaji Subhas Chandra Bose bilemteta pa nüngtem nung “British Road” ta ser Kohima anüolen tsütsü New Secretariat nungi Merema nung aliba High Court, Naga Hospital aser Paramedical Colony adena Forest Colony tashi gari lenmang yanglutsüla, ta shia lir.
Parnokisa, ano anüdoklen tsütsü “Japanese Road” ta ser Arudura Hill nungi Lerie, Chandmari den Sikhazou adena BSF camp tashi gari lenmang yanglutsüla, ta metetdaktsü.
Parnoki ashiba agi, item ama project ajanga India-Japan aser India-British tesendaktep-a ano tajungba akumtsü.
Ajioda Angh, Acharya-i NERFFSO dang pai iba shidiji Ato kilonser nem agutsütsü ta shiogo.