NESO-i Citizenship Bill 2016 anema lungkak aiter

Guwahati, Yimpoksüi (November) 20 (Agencies): Citizen (Amendment) Bill 2016, Foreigner (Amendment) Order 2015, Passport (Entry in to India) Notification 2015 aser long term visa agienang ta takhangba agüja Mongulbar nungi North East Students’ Organization (NESO)-i Northeast ajungalen lungkak aitba sentongtem agitsü tenzükogo.
NESO ya Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aser All Arunachal Pradesh Students’ Union (AAPSU) züngsemba kaketshirtem tentet ka lir.
Hopta ana tejaklen parnoki North East Region nung lungkak aittsüba osang metetdakja liasü aser tanü parnoki Guwahati nungi iba sentong tenzükogo.
Sentong nung Northeast kübok kaketshir telok 8 prongla nungi züngsemtem aden aser lennirtemi o jembi.
Centre sorkari lisopurtem anema Citizenship (amendment) Bill agizükra lungkak aitba mapa tuluba aser tesashiba agitsü ta tanü NESO-i kümdangtsü olen ka metetdaktsü.
Parnokisa Citizenship Bill atema shimba Joint Parliamentary Committee (JPC) dang tatembang telemtetba ka magidang tanga Northeast state tem semdangtsü atema metetdaktsü.
JPC-i Assam aser Meghalaya state ana dang semdanga lir.
Tanü Delhi nung Bill atema tentetba Joint Parliamentary Committee’s (JPC) senden amentsü ghonda ishika dang lia NESO-i Guwahati nung lungkak aitba sentongji agi.
“Northeast nung state teneti Bill anema longjema lir ta sayutsü atema iba sentong agir” ta All Assam Student Union (AASU) adviser Samujjal Bhattacharya-i ashi.
Taküm May ita JPC-i Assam semdang aser Brahmaputra o Barak Valley semdang. Telok balalai Bill posema aser anema züluba shiditem osang jangjatsü atema JPC-i Assam semdang. Parnoki semdangba sülen mapang tatsüka dang lir Conrad Sangma-i aniba Meghalaya Democratic Alliance (MDA)-i Bill anema noktaktsü lemtet.
“Meghalaya Cabinet-i Bill anema telemtetba agiteter süra, kechiba Assam sorkaribo magiteter?” ta Bhattacharya-i tanü asüngdang.
“Iba ya Assam atema dang masü saka Northeast ajunga atema tebilemtsü ka lir. Northeast ya ozüng alema arurtem jenokdak ka masü. Onok maitsü, oshi aser sobaliba lendong nung lir” ta NESO, Manipur Secretary General, Sinam Prakash-ia ashi.
“Tripura ya state tila ka lir aser British nungeri kodanga yimsü masü, saka tang parnok ozüng alema arurtemi yimsü asür. Onok sübosolemtsü, ozü oshi jembitsü atema onoki sorkar dang asüngdangtsüsa kümogo, onok ajak samaogo” ta Tripura Student Federation general secretary Sunil Debbarma-ia metetdaktsü.
“1881 Census nung Tripura nung lisopurtem nütsüng yongsük 63.77% liasü saka 2011 nungbo 31.80% dang liasü. Yimlibilema nenok state Tripura tanabuba tekümdaktsü ta ni mepishir” ta Debbarma-isa shisem.
Tanü sentong nung Khasi Student Union President Lambok S. Marngar-i “Citizenship (amendment) Bill ya Northeast indang maitsü balaka aliba menentsütsü atema yangluba” ta aitsü aser külen All Arunachal Pradesh Students’ Union President Tobom Dai-i “Centre sorkari Northeast nung lisopurtem samadaktsütsü meranger” ta tai tongloktsü.
November 30, 2018 nü NESO nung dena aliba teloktemi pei pei state yimtiba tenet nung lungkak aitba sentongtem ayonga agitsü.
Iba sülen Parliament session tenzükdang New Delhi nung lungkak aitba sentong ka agitsü, ta AASU General Secretary Lurinjyoti Gogoi-i metetdaktsü.
NESO nung züngsema aliba teloktemi pei pei state nung Minister, MLA aser MP tem den tsüngdong ajuruteptsü aser Citizenship Bill anema noktaktsü atema ayongzüktsü.