Neso-i Northeast ajungalen ILP amshitsü akhanger

Guwahati, October 2 (Agencies) : Manipur aser tanga northeast state tem nung tongti süa inyakba Inner Line Permit (ILP) maparen tali ajungmesogo aser ibaji Hokolbarnü North East Students’ Organization (Neso)-i northeast ajunga nung ILP inyakyim tenzüktsü takhangba agütsüba lir.
Centre sorkari Citizenship Act, 1955 yanglushia Bangladesh, Pakistan aser Afghanistan nungi nübo agi tangar memenepertem India nung arua lidaktsütsü mapa inyakba anema Neso chairman Samuel B Jyrwa aser general secretary Sinam Prakash Singh nati ashiba agi, Centre-i yangluba Bill yagi northeast nung Hindu Bangladeshi tem lidaktsütsü meranger.
“Parliament-i iba mapa inyakba ajanga northeast tesem ajunga jashidaktsütsü. Ozüng alema arurtem senso kümdaktsütsü atema Centre-i mapa inyaker, saka iba ya ajanga northeast nung lisopurtem aser kintem asoshi lendong bener arutsütsü. Iba Bill ya agizüka mapa kümra, NE nung lisopurtem aser kintem sama aotsü” ta Jyrwa-i ashi.
All Arunachal Pradesh Student’s Union, All Assam Students’ Union, All Manipur Students’ Union, Naga Students’ Federation, Khasi Students’ Union, Garo Students’ Union, Mizo Zirlai Paul aser Twipura Students’ Federation teloktemi Citizenship (Amendment) Bill, 2016 atema select committee nung chairman, Satyapal Singh dang tezüluba balala nung mepelaba osang metetdaktsüogo, ta Neso ketdangpurtemisa ashi.
“Iba Bill ajanga linük nung ozüng yanglurtemi northeast tarutsü atema mebilemtsüba sayur. Bangladesh nung Hindu nunger timtem ajurur süra, Centre indang external affairs policy nung langka mabensa alitsü südi” ta Neso-isa metetdaktsü.
Bangladesh nung nübo agi tangar memenepertem kümzüka ayutsüsa Centre-i linük ana tsüngda olemtep tajung akatsüla, ta Aasu adviser Samujjal Bhattacharyya-ia ashi.
Tripura nung lisopurtemi nübo agi tangar menenepba atishia, Neso vice-president Upendra Dev Varma-ia “ozüng alema arurtem northeast nung lidaktsüra, Assam aser Meghalaya ama Bangladesh den arrtsüa aliba state tem kanga timtemtsü” ta ashi.