NESO-i Northeast lisopur dang pelar; Longjemer noktaktsü ayongzüker

Dimapur, February 13 (TYO): North East nung aliba lisopurtem ajak longjemer noktakba aser inyakba ajanga India sorkari Rajya Sabha nung Citizenship (Amendment) Bill 2016 mebenoktet aser iba atema tenüngsang agütsür, ta North East Students’ Organisation (NESO)-i tanü metetdaktsü.
NESO nung Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aser All Arunachal Pradesh Students’ Union (AAPSU) teloktem züngsema lir.
Iba Bill tesashi anema bendanga agüja inyakba telok ajak dang onoki pelar. North East kübok state sorkar balalai iba tebilemtsü atema tasü itta noktakba atema pelar. Conrad Sangma-i anir Meghalaya, Zoramthanga-i anir Mizoram state sorkartem den Students’ Union, Social Organisation, Women Organisation ajak dang pelar, ta NESO Chairman Samuel Jyrwa aser Secretary General Sinam Prakash Singh nati sangdong ka nung ashi.
Bihar Chief Minister Nitish Kumar-i par JD(U) National Executive Council nung CAB anema noktaktsü bangzüng ka renemba atema kanga pelar. Maneni, Shiv Sena, Congress (I), SP, BJD, TMC, DMK, SAD, NPP, AGP,TDP, BPF aser tanga political party temi CAB anema noktakba mapa posema nungitba atema pelaba shisemer, ta NESO mendenpurtemisa metetdaktsü.
NESO-isa Tripura, Manipur aser Assam nung CAB anema noktakba mapang yiruyibongertem bilemteter aser parnoki tasü itta noktakba atema tenüngsang agütsü.
Iba ya Northeast lisopurtem atema ‘Moral Victory’ ka lir aser iba ya asenok longjemer noktakba ajanga anguba takok ka lir, ta NESO mendenpurtemisa ashi.
CAB anema inyakba mapa ajanga India sorkari asenoki akhangba odangbo magizüktsü ta sayur. North East lisopurtem longjemer rara nung dang asenok kümzüktsü ta iba mapa ajanga sayur. Tatemsa, NESO-i India sorkar dang North East nung lisopurtem anema asalentong meyanglutsü atema kümdangtsü metetdaktsür, ta Samuel Jyrwa aser Sinam Prakash Singh nati ashi.