Nestle-i maggi tanaben ayoktsü metetdaktsüogo

New Delhi, November 09 (Agencies): Küm 32 tejen brand kodanga mangatettep nung majemoki aliba taküm tetsükdaktsü kar ajurua linük nung ita pongu tashi Maggi mayoktsü nokdangba sülen Maggi noodles, yimti 100 nung ayoktsü tenzükogo aser iba chiyutsü online nunga ‘snapdeal’ ajanga alitettsü, ta Nestle India-i Hombar nü sangdongogo.

“Deepawali benjung atongtsü anogo ka lia aser Dhanteras anogo nung Maggi Noodles tanaben atoktsü maongka anguba ya onok asoshi kanga tepelatsü mapang ka lir,” ta taküm June 5 nü nungi Maggi mayoktsü ozüng züngtsür aliba tang tanaben ayoktsü sangdongba mapang, Nestle India Mendenbuba aser managing director Suresh Narayanan-i ashi.

“Nestle India ajuruba tetsükdaktsüji kanga ulura liasü. Aji oda süaka onoki Maggi noodles nung kecha tai mali ta temulung ulua bilema liasü. Company asoshi iba brand ya kanga tongtibang lir,” ta Narayanan-i kasa sentong nung osangbenertem dang ashi.

Mezüngbuba ‘masala’ maggi ayoktsü sentong lir aser iba sülen ang tanga ayok tenzüktsü, ta pai ashi.

“Maggi noodles ya linük nung aliba nüburtem den tesendaktep kanga tashi ita lir aser tang nungi ano tali tashi ita aotsü amanger. Iba den külemi Nestle India aser Snapdeal na loktepa, tang benjung mapang offer agütsütsü sentong yanglutetba asoshi kanga pelar,” ta paisa ashi.

Taküm June 5 nü Food Safety and Standards Authority of India (FSSAI) ajanga maggi noodles nung ‘lead’ lateta aliba dang nungi tali enoka aliba ajanga temang atema lendong lir ta shia mayoktsü ozüng agüja liasü.

Ita pongu tashi court nung iba ken o nung rara arurdang, Bombay High Court-i ozüng agütsüba ama laboratory asem tashi nung tetendangba ajak kokteter, Nestle-i masala Maggi noodles tan ita nungi ayoktsü asoshi taoba Bodhbarnü metetdaktsüogo.

Iba chiyutsü ya tesüiba mapang den kasa asütsü ajisüaka tang nungibo pongdang nung “no-added MSG (monosodium glutamate)” ta züluba mangutsü.

Tan maggi noodles tasenba ya Nanjangud (Karnataka), Moga (Punjab) aser Bicholim (Goa) nung yanglur.

Tang anünga aliba mapaji sorkar-i company dang sen crore 640 senji achitsü benokba ken o ajanga nüburtem makmakshimakdaktsüba aser business tsütsü tim masü inyakba bentettsü dang anunga lir.