Netaji file atema India linüki mepishiba ama inyaktsü: Russia

 

New Delhi, October 20 (Agencies): Mongolbar nü Russia Foreign Minister, Sergey Lavrov-i India External Affairs Minister Sushma Swaraj dang, India-i Netaji Subhas Chandra Bose indang file tem sangdongtsü mepishiba atema inyaktsü, ta shiogo.

Tang Swaraj Russia linüki oa lir aser lai Netaji indang file sangdongba maparen nung yariteptsü asoshi Lavrov dang teyari meshia liasü.

“Netaji indang file kar danga lemsateptettsüsa ali asü mali ta onoki asüngdang aser Foreign Minsiter Lavrov-i, Russia ket nung iba onük indang osang kar danga ali asü mali’ar pai reprangdangtsü ta shiogo,” ta Ministry of External Affairs (MEA) otongdar, Vikas Swarup-i ashi.

 India nunger nüjiso atema rarasang Netaji indang miima aliba file tem sangdongtsüla, ta mapang talangka nungi takhangba agüja aruba sülen tan ita, October 14 nü Ato Kiloser Narendra Modi-i, sangküm January 23 nü nungi tenzüka sorkari Netaji indang file tem sangdong tenzüktsü, ta sangdonga liasü.

Puti otsü miima ayutsü nüngdak madoker ta shia Modi-i Netaji’er kinüngertem dang Netaji file sangdongtsü atema pai bendang linüktem danga mepishitsü, ta shiogo.

Taoba sorkartemi, item file tem sangdongba ajanga bendang linüktem den India tesentaktep raksatsü ta shia item file sangdongtsü memelungi aruogo.

Tawa West Bengal nung Mamata Banerjee’er sorkaribo parnok ket nung aliba Netaji file 64 sangdongogo.